Një grup i grave kërkojnë nga deputetët legalizimin e sprejit për vetëmbrojtje.

Grupi “Kolektivi për Mendim dhe Veprim Feminist” kanë zhvilluar një aksion sot, para Kuvendit të Kosovës.

Ky grup me anë të këtij aksioni kanë kërkuar që secila grua të ketë të drejtën të mbajë sprej vetëmbrojtës.

“Sot përsëritëm kërkesën tonë për legalizim të sprejit irritues për vetëmbrojtje pranë Kuvendit të Republikës së Kosovës. Duke e konsideruar thellësisht të padrejtë kriminalizimin e mjeteve për vetëmbrojtje për vajzat e gratë, ne kërkojmë që shteti përfundimisht të përgjigjet dhe të mos vazhdojë t’ua kriminalizojë edhe më tutje mbrojtjen e vetës”.

“Raportimet e përditshme të rasteve të dhunës seksuale po na tregojnë që siguria e vajzave dhe grave po vazhdon të neglizhohet nga institucionet shtetërore, duke i lënë gratë dhe vajzat të pambrojtura dhe lehtësisht të cënueshme në çdo hapësirë. Sulmet seksuale, përdhunimet e ngacmimet janë përditshmëria e grave dhe vajzave në Kosovë. Pra, për një pjesë të madhe, çdo ditë është luftë. Çdo ditë ato jetojnë në ankth e frikë, pa shumë mundësi mbrojtjeje. Duke qenë që shteti po dështon të ofrojë siguri, atëherë ne detyrohemi ta mbrojmë vetën, me të gjitha mjetet që i kemi në dispozicion. E këtë, nuk do të vazhdojmë t’ia lejojmë shtetit të na mohojë”.

“Ne kërkojmë që përdorimi i sprejit irritues të dekriminalizohet për përdorim për vetëmbrojtje. Ne nuk do të ndalemi së kërkuari siguri për vetën e secilën vajzë e grua që sot jeton me frikë. Deri atëherë kur të gjitha të jemi të lira e të sigurta!”.

Komento:

	Komenti