Për shumë njerëz, hipja në ashensor është një dukuri e përditshme.

Futen në lift dhe e shtypin butonin për katin në të cilin dëshirojnë të shkojnë, pastaj dalin kur hapet dera pa menduar gjatë.

Por, sikur çdo mekanizëm tjetër edhe ky mund të mos funksionojë gjithmonë siç duhet.

Ditëve të fundit në Kosovë ka pasur reduktime të vazhdueshme të rrymës, e rrjedhimisht edhe disa raste kur qytetarët kanë mbetur të ngujuar në ashensor.

Por, as në mungesë rryme e as në rrethana të tjera të bllokimit, njerëzit nuk duhet të bëjnë ndonjë veprim të ngutshëm, e as të kaplohen nga paniku.

Luaras Haxhiu, përfaqësues i një kompanie ashensorësh, tha për Klanin se shumica e lifteve kanë ajërosje, dhe mjafton të pritet për ndërhyrje të mirëmbajtësve nga jashtë.

“Preferohet të ulet në kabinë, jo të qëndrohet në këmbë dhe në asnjë mënyrë nuk guxon të tentohet për të dalë ose me hapë portën. Pothuajse të gjithë ashensorët e kanë ventilimin poshtë tek një kornizë, apo tek dyshemeja e ashensorit ku zakonisht furnizohet me ajër. Kjo është fobi ose psiqike, sepse nuk mund të ndodh realisht me mbetë pa ajër në ashensor, sepse ajri depërton gjithmonë”, tha Haxhiu.

“Gjithmonë duhet të insistohet të preket alarmi që duhet të jetë funskional, meqë është sistem që funskionon me bateri, dhe realisht do të duhej që nëse e shtyp butonin të lidhesh me qendrën e thirrjeve dhe të lajmërohet servisi”, tha ai. “Insistohet gjithmonë me kontaktu personat përgjegjës, që në këtë rast janë kompanitë të cilat duhet të kenë kontratë mirëmbajtjeje, pra janë personat të cilët janë të çertifikuar për mirëmbajtje të ashensorëve dhe rasti më i keq i mundshëm është kur zjarrfikësitë intervenojnë dhe bëjnë tërheqjen e personave që janë brenda”,

Duke qenë se në ashensorë shpeshherë nuk funskionojnë as thirrjet telefonike, ai u shpreh se për këtë arsye duhet të ketë një sistem manual i cili konektohet me qendrën e thirrjes së mirëmbajtjes, sistem ky që sipas tij diku 90 për qind e kompanive të instalimit nuk e aplikojnë.

Më poshtë ju sjellim edhe disa këshilla të përgjithshme të cilat mund t’i ndiqni nëse mbeteni brenda në ashensor:

Merrni frymë thellë dhe qëndroni të qetë

Për njerëzit që vuajnë nga klaustrofobia, bllokimi në ashensor mund të jetë përjetim shumë i keq, prandaj ata dhe të gjithë njerëzit e tjerë, duhet të mundohen ta qetësojnë vetën duke marrë frymë thellë, sepse nervoza mund t’a përkeqësojë gjendjen. Ndodh që shumë njerëz e përjetojnë keq, duke qarë e bërtitur, por kjo nuk e zgjidh dot problemin. Ju duhet të mundoheni ta ngushëlloni vetën dhe kjo ndodh me shtypjen e butonit të thirrjes për ndihmë, i cili konsiderohet të jetë një shpresë për personat që janë brenda.

Mundohuni të argëtoheni

Nëse ka njerëz të tjerë në ashensor, atëherë mundohuni të argëtoheni, flisni diçka ose luani ndonjë lojë. Një lojë e cila preferohet të luhet në raste të tilla është “E vërteta dhe gënjeshtra”, pasi është vërtetuar se mund ta largojë vëmendjen nga ajo se çka po ndodh rreth jush.

Mos harroni se jeni të sigurt

Derisa prisni që të vijë ndihma, është e rëndësishme të mbani mend se jeni krejtësisht i sigurtë. Kompanitë e ashensorëve zakonisht bëjnë përpjekje të mëdha për të siguruar që njerëzit të jenë të sigurtë edhe kur bllokohen brenda. Ju mund të keni edhe sikletin se jeni vonuar për punë apo për ndonjë takim, por gjithsesi duhet të mundoheni të qëndroni të qetë.

Komento:

	Komenti