Kina i hakmerret ShBA-së në mënyrën e njëjtë siç u ndëshkua.

Kina ka vendosur sanksione ndaj disa individëve dhe organizatave amerikane si kundërpërgjigje ndaj sanksioneve të fundit të ShBA-së kundër zyrtarëve kinezë në Hong Kong.

Në mesin e personave që do të preken nga sanksionet e Kinës është edhe ish-sekretari i Tregtisë, Wilbur Ross.

Shtetet e Bashkuara iu vendosën sanksione zyrtarëve kinezë në Hong Kong për shkak të rolit të tyre në shtypjen e pakënaqësive në atë territor, shkruan BBC, transmeton Gazeta Express.

Të premten, Ministria e Jashtme e Kinës tha se sanksionet e reja amerikane kanë për qëllim që ta njollosin mjedisin biznesor të Hong Kongut dhe i shkelin rëndë ligjin ndërkombëtar e normat themelore për qeverisjen e raporteve ndërkombëtare.

Kjo ministri tha se do të vendosë sanksione kundër disa zyrtarëve e organizatave amerikane, përfshirë ish-zyrtarin e lartë, Ross.

Në mesin e të sanksionuarve janë edhe Sophie Richardson, drejtoreshë e organizatës “Human Rights Watch” për Kinën, dhe Adam King nga Instituti Ndërkombëtar Republikan.

Sekretarja për shtyp e Shtëpisë së Bardhë, Jen Psaki, tha para gazetarëve se hakmarrja e Kinës nuk i pengon Shtetet e Bashkuara.

“Këto veprime janë shembujt më të fundit të asaj se si Pekini ndëshkon qytetarë privatë, kompani dhe organizata të shoqërisë civile si mënyrë për të dërguar sinjale politike”, tha ajo.

Komento:

	Komenti