Kryetari i Kuvendit të Kosovës, Glauk Konjufca, gjatë fjalimit të tij në ceremoninë shtetërore të varrimit të policit Afrim Bunjaku, ka thënë se ai ra në krye të detyrës si oficer i denjë i Republikës në mbrojtje të lirisë, pavarësisë dhe sovranitetit të Republikës sonë.

Konjufca, ditën e 24 shtatorit e quan tragjike për familjen, miqtë e vendin.

“Dita 24 shtator, ditë tragjike e humbjen së jetës së tij, ditë e dhimbjes për familjen dhe miqtë, po ashtu është dita kur emri i Afrim Bunjakut u lartësua në piedestalin e dëshmorëve. Rreshteri Bunjaku dje mbrojti Kosovën me jetën e tij, ndërsa nga sot rënia e tij do t’i frymëzojë brezat e ardhshëm se si mbrohet atdheu. Dje ishte ditë e rëndë për Kosovën, demokracinë dhe paqen në rajon. Serbia edhe njëherë përmes strukturave terroriste paramilitare e sulmoi shtetin e pavarur e sovran të Kosovës edhe pse lufta me Serbinë përfundoi më 1999, Kosova po vazhdon ta mbrojë lirinë e saj dhe pavarësinë me gjakun e dëshmorëve”, u shpreh ai.

Konjufca tha se dje Republika e Kosovës triumfoi falë sakrificës sublime të Afrimit në mbrojtje të atdheut dhe vendosmërisë së shokëve të tij, policëve të Kosovës për t’u mos u zmbrapsur përballë Serbisë.