COVID-19 i shndërron qelizat e pacientit në “fabrika virusesh”.

Sipas ekspertëve, kur COVID-19 sulmon, ai e kthen qelizën e pacientit në një “fabrikë virusesh”. Ai e nis me sipërfaqen e qelizës, ku virusi ngjitet në një proteinë që normalisht ndihmon për rregullimin e presionit të gjakut të pacientit.

Pa dashur, qeliza e fut virusin brenda, aty ku “sulmuesi” shkarkon ngarkesën e tij dhe nxit atë (qelizën) të prodhojë më shumë viruse. Virusi komandon mekanizmat e vet qelizës për t’u bërë kopje kodit të tij gjenetik, duke prodhuar më shumë viruse, e duke shpërndarë mikrobe të tëra në sipërfaqen e qelizës, gjë që çon në infektimin e më shumë qelizave të tjera, raporton Zëri i Amerikës.

Barnat ekzistuese në barnatore mund të veprojnë për të goditur pjesë të ndryshme të kësaj “makinerie”. Megjithëse ato nuk janë prodhuar me qëllimin për t’u përdorur si ilaçe antivirale, në përpjekjen për të trajtuar numrin në rritje të infeksioneve me COVID-19, shkencëtarët shpresojnë se këto ilaçe mund të ofrojnë ndihmë.

“Ne nuk kemi luksin e një programi pesë-vjeçar për zbulimin e ilaçit. Kemi nevojë për diçka tani”, thotë Warner Greene, mjek e studiues në Institutin “Gladstone” të Virologjisë dhe Imunologjisë.

Kërkimet janë përqendruar tek disa ilaçe që shihen si “kandidatë” potencialë e çuditshëm njëkohësisht, siç janë ilaçet kundër kancerit, ato ndaj sëmundjes së zemrës, një ilaç kundër skizofrenisë dhe një trajtim për sëmundjen e Parkinsonit. Aktualisht po kryhet testimi me klorokinën, një ilaç kundër malaries.

Ilaçet ekzistuese, përgjigja më e shpejtë ndaj koronavirusit

Ndërsa numri i viktimave në mbarë globin nga COVID-19 u rrit në mbi 28 mijë, përpjekjet e përshpejtuara për të zhvilluar një kurë janë përqëndruar kryesisht tek përshtatja e ilaçeve ekzistuese që prodhohen për të luftuar sëmundje të tjera. Testimet janë përqëndruar në tre fusha, tek neutralizimi i vetë virusit, lehtësimi i disa prej simptomave të tij që rrezikojnë jetën, si dhe tek forcimi i sistemit imunitar të pacientëve për të luftuar infeksionin.

Ilaçet e vjetra për malarien, si klorokina dhe hidroklorokina, po testohen nëse janë në gjendje ta vrasin koronavirusin në stadin fillestar të infeksionit.

“Ky ilaç dëmton aftësinë e virusit për të hyrë në qeliza, duke e bërë atë që ta refuzojnë virusin. Nëse virusi nuk i infekton dot qelizat, nuk do të jetë aq efikas të riprodhohet apo të vetëshumëfishohet”, thotë dr. Hana Akselrod, e Shkollës së Mjekësisë në universitetin “George Washington”, raporton Zëri i Amerikës.

Presidenti Donald Trump thotë se ky kombinim ilaçesh do ta ndryshojë rrjedhën e gjërave. Por shkencëtarët thonë se nevojitet një studim për të verifikuar rezultatet dhe se këto ilaçe mund të jenë edhe toksike.

Një tjetër ilaç, i quajtur remdesivir, i cili nuk pati rezultat në trajtimin e pacientëve me Ebola, duket premtues ndaj koronavirusit. Edhe ky ilaç e pengon virusin të hyjë në qelizat e njeriut dhe të riprodhohet.

Ndër ilaçet që po testohen për të trajtuar simptomat e koronavirusit është Kevzara, një ilaç që përdoret për trajtimin e artritit reumatoid. Ky ilaç lehtëson bllokimin e mushkërive duke ulur reagimin e sistemit imunitar që e shkakton këtë irritim gjatë përpjekjes për të luftuar infeksionin.

“Ndërhyn në një pjesë të procesit të acarimit që është pjesë e mekanizmit mbrojtës të trupit ndaj një infeksioni masiv”, thotë dr. Akselrod.

Ndërkohë po zhvillohen testime masive të këtyre ilaçeve për të parë ndikimin që ato kanë dhe për të përcaktuar efektet dytësore negative.

Në Shtetet e Bashkuara po testohet edhe shërimi i pacientëve të sëmurë rëndë me koronavirusin, nëpërmjet plazmës së ripërtërirë. Kjo kërkon marrjen e antitrupave nga gjaku i pacientëve që janë shëruar plotësisht nga koronavirusi dhe injektimin tek pacientët e sëmurë.

“Kjo është një zgjidhje sipas metodës së vjetër, ashtu siç veprohej përpara se të shpikeshin antibiotikët”, thotë dr. Shmuel Shoham, i Shkollës së Mjekësisë të Universitetit Johns Hopkins.

Megjithatë, mjekët e përfshirë në të kaluarën në testet me plazmën e rikuperuar thonë se kjo metodë nuk është shumë efikase tek të sëmurët rëndë dhe e rekomandojnë kryesisht për parandalim dhe trajtimin e hershëm në sëmundjes.

Ekspertët e sëmundjeve ngjitëse thonë se gjetja e një kure efikase për koronavirusin mund të kërkojë muaj të tërë. Ndërsa zhvillimi i një vaksine për të parandaluar infeksionin mund të kërkojë mbi një vit.

Komento:

	Komenti