Shqipëria po vazhdon të përballet me krizë ekonomike për shkak të pandemisë COVID-19.
Sa më shumë kalojnë muajt, aq më të qarta bëhen pasojat që ajo solli në ekonomi infeksioni i padukshëm i COVID-19, dhe po aq më e pasigurt bëhet edhe e ardhmja.
Vetëm një gjë është e sigurt, që ekonomia nuk do të jetë më si më parë dhe ditët e “arta” të një aktiviteti normal dhe jetese të shkujdesur kanë marrë fund, të paktën për një periudhë afatmesme. Të gjitha pritshmëritë për ecurinë ekonomike, jo vetëm në Shqipëri, por në mbarë botën janë zhvlerësuar.
Humbjet në vend, në raport me vitin e mëparshëm, por dhe në krahasim me rritjen që do të kishte pasur vendi nëse nuk do të ishte përballur me pandeminë janë tepër të larta.
Sipas parashikimeve të Ministrisë së Financave, përpara se të fillonte kriza e COVID-19, Prodhimi i Brendshëm Bruto pritej që të arrinte në gati 19 miliardë euro në vitin 2022. Financat prisnin mesatarisht një rritje ekonomike prej rreth 4 për qind në vit.
Por, në relacionin e projektbuxhetit 2021, pritshmëritë për PBB-në në vitin 2022 tashmë janë zhvlerësuar në 14.5 miliardë euro.
Në vetëm tre vjet, pandemia COVID-19 pritet të fshijë rreth 8 miliardë euro të ardhura potenciale, që do të ishin krijuar nëse do të kishim pasur ecuri normale të ekonomisë (diferenca midis PBB-së së projektuar para krizës dhe pas krizës, përkatësisht për secilin vit).
Për vitin 2020, kur vlerësohet të ketë qenë kulmi i efekteve të COVID-19, ekonomia shqiptare pritet të tkurret nga 6.4 për qind, sipas parashikimeve të qeverisë shqiptare, deri në 9 për qind (nga Banka Evropiane për Rindërtim dhe Zhvillim). Fondi Monetar Ndërkombëtare pret që tkurrja të jetë 7.5 për qind dhe Banka Botërore në 8.4 për qind. Cilado që të jetë rënie, kjo do të jetë tkurrja më e madhe e ekonomisë që nga viti 1997, kur vendi ra me më shumë sesa 10 për qind.
Për vitin 2021, gjithnjë nëse nuk do të ketë mbyllje tjetër drastike, ekonomia pritet të rikuperohet me ngadalë, me rritje prej rreth 5 për qind deri 5.5 për qind, sipas pritshmërive të qeverisë dhe institucioneve ndërkombëtare. Sipas të gjitha gjasave, si rrjedhojë e rënies së fortë këtë vit dhe rikuperimit të ngadaltë vitin e ardhshëm, ekonomia pritet që të arrijë nivelin e para krizës vetëm në vitin 2022.
Tkurrja e ekonomisë pritet që të ulë dhe të ardhurat për frymë, të cilat sipas parashikimeve të projektbuxhetit pritet të bien me 6 për qind në vitin 2020.
FMN është edhe më pesimiste. Sipas saj të ardhurat për frymë të shqiptarëve në 2020 pritet të ulen me 425 dollarë ose me gati 8 për qind në krahasim me vitin e mëparshëm
Në rajon, Shqipëria me rreth 360 euro dhe Mali i Zi me 750 euro pritet të kenë rënien më të lartë të të ardhurave për frymë, për shkak të tkurrjes më të lartë ekonomike të parashikuar për këto vende, që janë të lidhura me turizmin.
Për maqedonasit, humbja do të jetë minimale (75 euro më pak) dhe për boshnjakët arrin në 210 euro për frymë më pak. Për shtetasit e Kosovës, humbja është 240 euro për frymë, me një rënie prej 6.5 për qind. Në rajon, shteti që ka qenë më rezistent ndaj krizës së COVID-19 është Serbia. Ky i fundit është ndër të paktët në botë, ku FMN parashikon që të ardhurat për frymë nuk do të bien, përkundrazi do të rriten lehtë apo me 70 euro. /Monitor/
7 °C
