Kryeministri i Kosovës, Ramush Haradinaj ka folur edhe njëherë rreth marrëdhënieve me Shtete e Bashkuara të Amerikës.

Ai sot priti në takim një delegacion të senatorëve dhe kongresistëve amerikanë të udhëhequr nga senatori James Inhofe, dhe i shoqëruar edhe nga ambasadori amerikan në Kosovë, Philip Kosnett. Haradinaj thotë se Kosova do të jetë gjithmonë pranë amerikanëve.

Kongresistë dhe senatorë amerikanë vizituan Kosovën për 11 vjetorin e Pavarësisë. Kryeministri Haradinaj i ka pritur zyrtarët amerikanë, ndërsa ka thënë se aleanca me SHBA’në do të jetë e përjetshme.

“Amerika është lidhja më e rëndësishme e Kosovës. Ne jemi përgjithmonë të rreshtuar krah Amerikës dhe jemi aleatët më besnikë të saj“, tha kryeministri Haradainaj duke shprehur po ashtu falënderim për mbëshetjen e SHBA-së në të gjitha proceset nëpër të cilat po kalon Kosova e veçmas tani në këtë fazë të rëndësishme të përmbylljes së shumë temave të rëndësishme për vendin”, ka thënë Haradinaj.

Më tej, kryeministri Haradinaj shtoi se Kosova ndan vlerat dhe prioritetet me Amerikën në një gamë të gjerë aktivitetesh.

Kryeministri Haradinaj në këtë takim foli edhe për procesin e dialogut, konsolidimin ndërkombëtar të vendit dhe fuqizimin ekonomik.

Ndërkaq zyra e Kryeministrit nuk përmend të jetë folur për taksën, që po përplas Haradinajn me thirrjet e amerikanëve për ta hequr atë.

“Kosova është e përkushtuar për dialog, për fqinjësi të mirë dhe për partneritet të qëndrueshëm me vendet aleate dhe miqësi të përhershme me ShBA-në. Mbi këto vlera është ndërtuar edhe shteti ynë dhe mbi këto vlera do të qëndrojmë gjithmonë“, tha kryeministri Haradinaj duke kërkuar mbështetjen e mëtutjeshme të ShBA-së.

Ndërkaq, sipas ZKM’së, senatori Inhofe u shpreh i nderuar që udhëhoqi delegacionin amerikan, në Kosovë. “Kosova është një partner i rëndësishëm për Shtetet e Bashkuara dhe mbështetja jonë do të vazhdojë”, tha Senatori Inhofe.

Komento:

	Komenti