Kurti: Prishtina është i kryeqytet i Republikës, Prekazi kryeqytet i kryengritjes.
Në shënim të 15- vjetorit të Pavarësisë së Republikës së Kosovës, Kryeministri i Republikës së Kosovës, Albin Kurti, bashkë me Presidenten e vendit, Vjosa Osmani, Kryetarin e Kuvendit të Republikës, Glauk Konjufca dhe presidentin e Republikës së Shqipërisë, Bajram Begaj, morën pjesë në ngritjen solemne të flamurit të Republikës së Kosovë, nën intonimin e himnit shtetëror.
Pasi nderuan flamurin e Republikës së Kosovës, homazhe u bënë edhe te Monumenti i të Pagjeturve, për të vazhduar pastaj me homazhe dhe vendosje të luleve të freskëta edhe te varri i ish-presidentit Dr. Ibrahim Rugova dhe te varri i veprimtarit, Adem Demaçi.
Kryeministri Kurti me rastin e 17 Shkurtit, bëri homazhe dhe vendosi lule edhe të Kompleksi Memorial “Adem Jashari” në Prekaz, duke e quajtur këtë të fundit si kryeqytetin e kryengritjes.
“Teksa festojmë dhe gëzohemi në këtë 15-vjetor të Shpalljes së Pavarësisë, i kujtojmë me mall, dhembje e krenari ata të cilët u vetëmohuan, sakrifikuan dhe dhanë jetën e tyre për lirinë e vendit. Prishtina është i kryeqytet i Republikës por Prekazi është kryeqytet i kryengritjes shqiptare’’, u shpreh kryeministri.
Vizita në Prekaz, shtoi më tej, në këtë ditë kaq të rëndësishme për popullin dhe historinë tonë, tregon që rruga jonë përpara gjithmonë e ka në mendje dhe në kujtesë çmimin e lartë që kemi paguar për lirinë që gëzojmë.
“Urime e gëzuar 15- vjetori i Pavarësisë të gjithë shqiptarëve kudo që janë”, tha kryeministri.
Pas Prekazit, kryeministri Kurti bëri nderimet e tij edhe te Monumenti i Policëve të Rënë në detyrë, si dhe te monumenti “Heroinat”.
Deklarimi i plotë për media i Kryeministrit Kurti pas homazheve në Prekaz:
Teksa festojmë dhe gëzohemi në këtë 15-vjetor të Shpalljes së Pavarësisë, i kujtojmë me mall, dhembje e krenari ata të cilët u vetëmohuan, sakrifikuan dhe dhanë jetën e tyre për lirinë e vendit. Prishtina është kryeqytet i Republikës por Prekazi është kryeqytet i kryengritjes shqiptare, andaj ardhja jonë këtu në këtë ditë kaq të rëndësishme për popullin dhe historinë tonë tregon që rruga jonë përpara gjithmonë e ka në mendje dhe në kujtesë çmimin e lartë që kemi paguar për lirinë që gëzojmë. Urime e gëzuar 15- vjetori i Pavarësisë të gjithë shqiptarëve kudo që janë.
-1 °C
