Vinicius i mërzitur nga largimi i Solarit.

Sulmuesi brazilian i Real Madrid, Vinicius Jr, është shprehur shumë i mërzitur me largimin e Santiago Solarit nga stoli i skuadrës.

Sot, bordi drejtues i ‘Los Blancos’ ka njoftuar se Zinedine Zidane do të jetë trajneri i ri i skuadrës, duke bërë të ditur se Solari do të largohet nga ajo pozitë.

Ky lajm e la tejet të mërzitur anësorin e ri, i cili nën urdhrat e Solarit pati disa paraqitje shumë të mira, sidomos në ‘El Clasico’.

“Faleminderit për gjithçka zotëri. Për ndihmën që të vija këtu, për besimin dhe për mundësinë, Zoti të bekoftë, ti meriton të gjitha të mirat në jetën tënde” ka shkruar Vinicius në ‘Instagram’ transmeton lajmi.net.

Solari ishte emëruar trajner i përkohshëm i Real Madrid gjatë muajit nëntor, kur zëvendësoi Julen Lopeteguin i cili nuk pati rezultatet që priteshin nga ai.

Eliminimi nga Kupa e Mbretit ndaj Barcelonës dhe dështimi në Ligën e Kampionëve ndaj Ajax ishin goditja e fundit e Santiago Solarit.

Komento:

	Komenti