Kandidatja për deputete nga radhët e LDK-së, Linda Bekteshi, ka thënë se gratë po luajnë një rol kyç në ndryshimin pozitiv të Kosovës.

Ajo, së bashku me kandidatin tjetër për deputet, Xhafer Gashi, kanë takuar disa gra nga Obiliqi, me të cilat kanë ndarë programin dhe vizionin e LDK-së për një të ardhme më të mirë.

Bekteshi ka theksuar se gratë janë promotore të ndryshimeve pozitive dhe suksesshme në të gjitha nivelet e qeverisjes.

“Së bashku me kandidatin për deputet, Xhafer Gashi, patëm kënaqësinë të takonim disa zonja nga Obiliqi, me të cilat ndamë programin dhe vizionin e LDK-së për një Kosovë më të mirë. Dita-ditës po dëshmohet se gratë janë promotore të ndryshimeve pozitive dhe të suksesshme në të gjitha nivelet e qeverisjes“, shkroi ajo në Facebook.

66-shi i LDK-së shtoi se partia e saj i jep përparësi dhe një rol të veçantë përfaqësimit të gruas në politikë.

“Roli i gruas në LDK, me besim të plotë se përfaqësimi i saj është i garantuar në institucionet komunale dhe qendrore, në institucionet arsimore, shëndetësore e kulturore, LDK-ja i jep përparësi dhe rol të veçantë politik përfaqësimit të gruas në jetën politike”.

Bekteshi tha se është detyrë e të gjithëve të hapin rrugën për shumë gra dhe vajza të tjera që dëshirojnë të jenë pjesë e vendimmarrjes dhe të kontribuojnë në përmirësimin e shoqërisë kosovare.