Startimi i sezonit të ri të Big Brother Fan Club, nën moderimin e Kiara Titon, është shoqëruar që në minutat e para me polemika dhe reagime të forta në rrjetet sociale.

Hyrja e pazakontë e Luiz Ejllit në studio, në rolin e partnerit dhe mbështetësit të saj, u kthye menjëherë në një nga momentet më të komentuara të mbrëmjes, duke ndezur diskutime të shumta mbi mesazhin dhe nëntekstin e fjalëve të tij.

Fituesi i Big Brother VIP, gjatë monologut hapës, zgjodhi një gjuhë simbolike dhe emocionale, duke lënë të kuptohet se Kiara ka kaluar pengesa dhe tentativa për t’u lënë në hije.

“Janë mundu me lënë në hije, por hija nuk e mbulon kurrë dritën. Ajo është dritë dielli,” u shpreh Luizi live, një deklaratë që u interpretua gjerësisht si një thumb i drejtpërdrejtë, qoftë ndaj produksionit, qoftë ndaj skeptikëve që kanë vënë në dyshim rrugëtimin dhe pozicionimin profesional të Kiarës në ekran.

Këto fjalë u përhapën me shpejtësi në rrjet, ku ndjekësit u ndanë në dy kampe. Një pjesë e publikut e vlerësoi deklaratën si një mbështetje romantike dhe publike ndaj partneres së tij, ndërsa të tjerë e panë si të panevojshme dhe provokuese, duke rikthyer narrativën e konfliktit me produksionin e Top Channel, një temë që shumëkush e konsideron të mbyllur prej kohësh.

Reagimi më i drejtpërdrejtë dhe më i fortë erdhi nga Anaid Kaloti, ish-fitues i Big Brother 6, i cili përmes një postimi kritikoi hapur qasjen e Luizit.

Sipas Anaidit, çdo ide e një lufte me produksionin është e tejkaluar dhe nuk ka më vend në realitetin aktual televiziv.

Ai theksoi se Top Channel nuk është armik dhe se Kiara Tita është pjesë e ekranit më të fuqishëm shqiptar, ku jo vetëm që nuk është lënë në hije, por përkundrazi ka pasur vazhdimisht hapësira dhe projekte të rëndësishme.

Kaloti përmendi konkretisht angazhimet e Kiarës në programe të njohura si Portokalli, Dancing Ëith the Stars dhe tashmë Big Brother Fan Club, duke nënvizuar se këto janë prova të qarta të besimit dhe mbështetjes që ajo ka marrë nga televizioni.

Në këtë kontekst, ai e cilësoi deklaratën e Luizit si një dramë të panevojshme që, sipas tij, nuk funksionon më si strategji për të tërhequr vëmendje.

Në fund të reagimit të tij, Anaidi shtoi edhe një reflektim më të gjerë mbi mënyrën se si shpesh burrat, në përpjekje për të mbrojtur gratë e tyre, përfundojnë duke komplikuar situatat. “Ne burrat gjithmonë prishim punë, kur gjoja zotohemi të mbrojmë gratë,” shkroi ai, duke lënë të kuptohet se deklarata të tilla mund të dëmtojnë më shumë sesa të ndihmojnë imazhin dhe rrugëtimin profesional të tyre.

E gjithë kjo ka bërë që nisja e Big Brother Fan Club të shndërrohet jo vetëm në një event televiziv, por edhe në një temë të nxehtë debati publik, ku mbështetja, interpretimet personale dhe rivalitetet e vjetra vazhdojnë të ndërthuren, duke e mbajtur vëmendjen e publikut të fokusuar jo vetëm te formati, por edhe te dinamikat mes personazheve të njohur të ekranit shqiptar./ORAinfo/

Komento:

	Komenti