Lutfi Haziri thote se me Vetëvendosjen kemi ndërtuar bashkëpunim opozitar.

Nënkryetari i Lidhjes Demokratike të Kosovës, Lutfi Haziri, ka thënë se bashkëpunimi midis LDK-së dhe Lëvizjes Vetëvendosje ekziston.

Gjatë një interviste në Info Magazine të Klan Kosovës, ai ka deklaruar se këto dy parti janë të koordinuara që të bashkëpunojnë në çështje që i bashkojnë dhe jo në ato që i ndajnë.

“Lidhja Demokratike e Kosovës është partia më e gatshme se gjithë partitë e tjera për ditën e zgjedhjeve. Ne nga viti i kaluar kemi kërkuar legjitimitet politik dhe tani me dorëheqjen e Ramush Haradinajt nga posti i Kryeministrit kemi ardhur në rrafshin politik që ne e kemi kërkuar”.

“Ne do të dalim të bashkuar. Prej fillimit ne kemi kërkuar legjitimitet, sepse PAN-i ka qenë koalicion joparimor. PAN-i e zvarriti Kosovën për dy vite dhe përfundoi aty ku është pritur”.

“Haradinaj ka qenë kryetar i Qeverisë i cili në emër të AAK-së është munduar ta balancojë rivalitetin mes dy partive që janë konsideruar si armiq. Kemi kërkuar zgjedhje që një vit e dy muaj dhe tani natyrisht se jemi të gatshëm për një gjë të tillë”.

“Në të njëjtën kohë, ne poashtu kemi ndërtuar bashkëpunim opozitar. Ne me Lëvizjen Vetëvendosje dhe Partinë Socialdemokrate kemi arritur të koordinohemi me politika karshi koalicionit PAN. Në rrafshin opozitar ne jemi koordinuar deri në fund”.

“Kurti e ka konstatuar që bashkëpunimi mes dy partive është në rrafshin politik dhe të grupeve parlamentare. Mirëpo, organet e LDK-së janë autoritete politike që vendosin për mënyrën se si do të ecim tutje. Bashkëpunimi mes dy partive ekziston, jemi koordinuar që ta bashkohemi në çështje që na bashkojnë dhe jo ato që na ndajnë”.

“Aktualisht, LDK-ja e ka kryetar Isa Mustafën dhe do të qëndrojë kështu deri në ditën që një emër i ri do të dalë pas datës 3 gusht. Deri atëherë ne do t’u qëndrojmë besnikë strukturave aktuale”.

Komento:

	Komenti