Man Unitedi, apel tifozëve: Rrini larg stadiumit.

Manchester Unitedi i ka paralajmëruar tifozët të qëndrojnë jashtë stadiumit Old Trafford dhe stadiumeve të tjera ku do të luajnë Djajtë e Kuq, nëse Premierliga vendoset të rinisë.

Skuadra e Ole Gunnar Solskjaer do t’i rinisë seancat stërvitore në grupe të vogla nga e mërkura, përderisa klubet e Premierligës po bëhen gati për ta kompletuar sezonin 2019/20, transmeton Gazeta Express.

Të gjitha 92 ndeshjet e mbetura deri në fund të këtij sezoni të Premierligës do të duhet të zhvillohen prapa dyerve të mbyllura shkaku i krizës së sjellë nga virusi Covid-19.

Për këtë arsye, Manchester Unitedi e ka konfirmuar se do t’ua kthejë paratë të gjithë tifozëve që kanë blerë bileta për ndeshjet e Djajve të Kuq.

Nëse klubeve të Premierligës u plotësohet dëshira për t’i zhvilluar ndeshjet në stadiume të veta e jo në neutrale, atëherë skuadra e Solskjaer do t’i luante edhe katër ndeshje në Old Trafford. Kjo ka bërë që klubi t’u kërkojë tifozëve të mos grumbullohen jashtë stadiumeve gjatë ditëve të ndeshjeve.

“Ne e ndajmë me juve zhgënjimin që s’po keni mundësi ta shikoni nga afër Manchester Unitedin, por ju inkurajojmë të vazhdoni ta jepni përkrahjen tuaj besnike nga siguria dhe rehatia e shtëpisë suaj”, shkruhet në letrën e lëshuar nga klubi anglez.

“Ne gjithashtu ju kërkojmë që të bashkëpunoni me neve dhe të mos udhëtoni afër asnjë stadiumi ku ekipi ynë do të jetë duke luajtur. Duke na përkrahur nga shtëpia dhe duke i ndjekur udhëzimet e qeverisë, ju do të luani rol në përkrahjen e shoqërisë suaj, familjes suaj dhe familjes së Manchester Unitedit”.

Komento:

	Komenti