Një nga sfidat kryesore me të cilat po përballet Ruben Amorim te Milani është gjetja e mënyrës së duhur për të nxjerrë maksimumin nga Gonçalo Ramos.

Sulmuesi portugez ishte transferimi rekord i Milanit gjatë merkatos së verës dhe menjëherë u pa si zgjidhja afatgjatë për problemin e fanellës me numrin 9. Amorim e dëshironte bashkëkombësin e tij, ndërsa Ramos kërkonte një rol protagonist pas periudhës si alternativë te PSG-ja. Në letër, gjithçka dukej se po shkonte në drejtimin e duhur, transmeton ORAinfo.

Megjithatë, javët e fundit kanë ngritur disa pikëpyetje.

Në ndeshjen ndaj Benfica-s, Ramos e mbylli takimin për të tretën ndeshje radhazi pa regjistruar asnjë goditje në kuadrat. E njëjta gjë kishte ndodhur edhe ndaj Lazios dhe më herët ndaj Juventusit.

Edhe statistikat e tjera janë domethënëse. Në pesë ndeshjet ku ka qenë titullar, Ramos ka realizuar 14 goditje, por të gjitha kanë ardhur në dy takimet e para, kundër Torinos dhe Venezias. Ai ka regjistruar 1.55 xG, vetëm një gol dhe 158 prekje të topit, nga të cilat vetëm 20 kanë ardhur brenda zonës së kundërshtarit.

Ramos po largohet shumë nga zona

Një tjetër element që bie në sy është pozicionimi i sulmuesit. Sipas analizës së publikuar nga Calciomercato.com, Ramos kalon një pjesë të madhe të ndeshjeve jashtë zonës së rreptësisë, duke tentuar të lidhë lojën me mesfushën dhe lojtarët ofensivë.

Ai vrapon shumë dhe kontribuon në presingun e lartë, por kjo përpjekje fizike mund të ndikojë edhe në freskinë e tij në momentet vendimtare.
Problemi, megjithatë, nuk shihet vetëm si përgjegjësi e Ramosit.

Puna e tij pa top është e rëndësishme për mënyrën se si dëshiron të luajë Amorim, por presingu duhet të mbështetet nga e gjithë skuadra.

Për të funksionuar siç duhet, presingu i menjëhershëm duhet të jetë i koordinuar dhe i organizuar. I gjithë ekipi duhet të afrohet me sulmuesin në fazën e parë, në mënyrë që Milani të ketë mundësi ta rikuperojë topin sa më shpejt në gjysmëfushën kundërshtare.

Amorim duhet të krijojë kushtet për Ramosin
Në aspektin e karakteristikave, Ramos ka shumë prej elementeve të një sulmuesi të kompletuar. Ai është inteligjent, lëviz mirë mes linjave, sulmon hapësirat pas mbrojtjes dhe ka nuhatje për golin. Goli ndaj Venezias ishte një shembull i qartë i këtyre cilësive.

Për të shmangur situatat ku ai mbetet i izoluar, Milani duhet të rritet si ekip rreth tij dhe ta përdorë sulmuesin portugez si pikë referimi në fazën ofensive.

Një nga problemet që ende nuk është zgjidhur plotësisht është ritmi i lojës. Qarkullimi statik i topit dhe mungesa e shpejtësisë në aksionet sulmuese e bëjnë më të vështirë krijimin e hapësirave ku Ramos mund të jetë më efektiv.

Në këtë aspekt, nevojiten më shumë harmoni, guxim dhe lëvizje në fazën e ndërtimit të aksioneve.
Modriç mund të jetë një faktor i rëndësishëm
Përfshirja e Luka Modriç në mesfushë mund t’i japë Milanit më shumë kreativitet dhe të ndihmojë në çlirimin e cilësive teknike të Adrien Rabiot dhe Christian Pulisic në zonat ofensive.

Të dy lojtarët janë të aftë të luajnë në hapësira të ngushta dhe të lexojnë lëvizjet e sulmuesit, çka mund t’i japë Ramosit më shumë mundësi për të marrë topin në pozicione të favorshme.

Në të njëjtën kohë, edhe vetë Ramos duhet të bëjë hapin e radhës. Investimi prej më shumë se 70 milionë eurosh i bërë nga Milani gjatë verës ka rritur pritshmëritë ndaj tij.

Tani mbetet për t’u parë nëse Amorim do të gjejë formulën e duhur për ta rikthyer Ramosin në zonë dhe për ta bërë atë një nga pikat kryesore të sulmit të kuqezinjve. /ORAinfo/

Komento:

	Komenti