Eduard Kuçi dhe Dolce janë përballur drejtpërdrejt me njëri-tjetrin gjatë spektaklit të së hënës, në një moment që solli tension dhe riktheu në vëmendje raportin e tyre të ndërlikuar.

Përballja erdhi pas akuzave të ndërsjella që të dy kanë hedhur ndaj njëri-tjetrit, lidhur me një ftohje të dukshme në marrëdhënien e tyre, e cila sipas tyre nisi pas eksperiencës që Dolce pati në formatin italian “Grande Fratello”.

Gjatë spektaklit, produksioni transmetoi një klip ku shfaqeshin disa deklarata të mëparshme të Dolces, të bëra gjatë qëndrimit të saj në “Grande Fratello”, ku ajo fliste për mundësinë e një romance në Kosovë.

Këto deklarata duket se kanë ndikuar ndjeshëm në raportin mes saj dhe Edit, duke krijuar keqkuptime dhe distancë emocionale mes dyshes.

Eduardi, gjatë diskutimit, u shpreh se ka qenë Dolce ajo që është distancuar nga ai pas përfundimit të eksperiencës së saj jashtë vendit.

Ai kërkoi hapur që të dinte arsyet konkrete të këtij ndryshimi në sjellje, duke lënë të kuptohet se është ndjerë i lënë pas dore dhe i paqartë për pozicionin e saj ndaj tij.

Nga ana tjetër, edhe Dolce nuk i mohoi tensionet, duke pranuar se raporti i tyre ka kaluar një periudhë të vështirë pas gjithë asaj që ndodhi jashtë shtëpisë.

Megjithatë, pavarësisht debateve dhe sqarimeve, të dy u shfaqën të vendosur për ta lënë pas këtë histori dhe për të mos e vazhduar më tej këtë raport brenda shtëpisë, duke e konsideruar atë të mbyllur si pasojë e ngjarjeve të fundit.

Ky vendim u perceptua si një përpjekje për të shmangur drama të mëtejshme dhe për të ruajtur qetësinë në lojë.

Në një moment tjetër, gjatë hapësirës publicitare, u publikua edhe një video që ngjalli reagime në rrjet, ku Eduardi shihet duke e kafshuar Dolcen në krah në një skenë që u interpretua nga publiku si provokuese dhe e papritur, duke lënë vend për spekulime mbi natyrën reale të marrëdhënies së tyre.

Tashmë mbetet për t’u parë se si do të zhvillohet më tej raporti mes Eduard Kuçit dhe Dolces në vazhdim të spektaklit dhe nëse kjo përballje do të ndikojë në dinamikat e ardhshme mes tyre apo në lojën e përgjithshme brenda shtëpisë./ORAinfo/

Komento:

	Komenti