Mësimi fillon në këtë Komunë- reagon SBASHK-u – Ora Info Ballina | ORAinfo.com - Nuk ndalet

Mësimi fillon në këtë Komunë- reagon SBASHK-u

10:24 | 22 Janar 2019

Greva në arsim nuk është duke vazhduar në të gjitha komunat.

Në njërën prej komunave të Kosovës procesi i mësimit ka filluar sot.

Në komunën e Deçanit mësimdhënësit kanë nisur punën e tyre, dhe se procesi mësimor po mbahet normalisht.

Këtë e ka konfirmuar edhe vetë kryetari i kësaj komune, Bashkim Ramosaj.

Nga ana tjetër, kryetari i SBASHK-ut, Rrahman Jashari, thotë se informacionet që ata kanë nga terreni flasin ndryshe.

“Unë do të shkoj në Deçan, do të zhvilloj takim me këshillin grevist. Informacionet që kemi ne nga terreni flasin ndryshe, megjithatë ne do të lëshojmë një njoftim më vonë rreth qëndrimit të tyre”, ka thënë Jashari për Indeksonline.

Sipas Jasharit, kërkesat e vazhdueshme të kryetarëve të komunave janë plotësisht të paarsyeshme pasi që ata nuk duhet të pyeten për këtë çështje.

“Kryetarët e komunave nuk janë ata që duhet të pyeten, ata nuk kanë pse përzihen për këtë punë. Ne do të marrim informacione për secilën komunë dhe do t’iu njoftojmë saktë”, ka shtuar tutje ai gjatë bisedës.

Jashari thotë se nuk e kanë ndërmend ta ndërpresin grevën derisa Qeveria të përmirësojë ofertën e tyre.

“Ne vazhdojmë të kemi qëndrimin tonë të njëjtë, nuk do ta ndalim grevën dhe kujtojmë se oferta e qeverisë është shumë e ultë dhe e vogël dhe ata edhe më tej kanë mundësi të përmirësojnë ofertën e tyre”, vlerëson Jashari.

Ndryshe, sipas vendimit të fundit të Qeverisë dhe pajtimit të Komisionit Parlamentar, në gjithë sistemin arsimor parauniversitar me koeficientin 0.20, pra rritja e një koeficienti që përkthyer në shifra i bie rreth 48 euro për secilin mësimdhënës duke u bazuar në pagën aktuale që sot kanë.

Komento: