Mijëra persona u mblodhën në Mal të Zi të dielën për të kërkuar dorëheqjen e zyrtarëve të lartë të sigurisë pas një të shtënave masive që ndodhën këtë javë duke lënë 12 persona të vdekur, përfshirë dy fëmijë.

Duke brohoritur “Dorëheqje” dhe “Vrasës”, protestuesit jashtë godinës së Ministrisë së Brendshme në kryeqytetin Podgoricë kërkuan që ministri i Brendshëm Danilo Šaranović dhe zëvendëskryeministri për Siguri dhe Mbrojtje, Aleksa Bečić, të japin dorëheqjen.

Milo Peroviq, nga një grup studentor që ndihmoi në organizimin e protestës, u tha turmës se njerëz të pafajshëm vdiqën nën përgjegjësinë e tyre.

“Ju dështuat të na mbroni, prandaj jepni dorëheqjen!” tha Peroviq.

Shumë banorë të Cetinës dhe malazezë të tjerë besojnë se policia e keqmenaxhoi situatën dhe nuk ka bërë mjaftueshëm për të përmirësuar sigurinë që nga masakra e parë, e cila ndodhi në gusht të vitit 2022.

Të shtënat e së mërkurës ndodhën si rezultat i një zënke në një lokal. Një burrë 45-vjeçar nga qyteti shkoi në shtëpi për të marrë armën dhe më pas u kthye në lokal duke hapur zjarr. Ai vrau katër persona aty dhe tetë të tjerë në vende të ndryshme përpara se të vriste veten.