Presidenti i Kroacisë, Zoran Milanoviq, hodhi poshtë pretendimet e presidentit serb Aleksandar Vuciq i cili sulmoi marrëveshjen ushtarake mes Zagrebit, Tiranës dhe Prishtinës të cilat sipas tij janë kundër Serbisë. Milanoviq i cilësoi akuzat e Vuciqit si të pabazuara dhe propagandistike.

Gjatë ceremonisë së organizuar për Ditën e Forcave të Armatosura të Kroacisë, Milanoviq theksoi se Kroacia mbetet një shtet përgjegjës dhe i përkushtuar ndaj stabilitetit rajonal dhe bashkëpunimit ndërkombëtar.

“Pretendimet se Kroacia dhe shqiptarët po planifikojnë sulm ndaj Serbisë janë absurde dhe pa asnjë bazë reale. Këto deklarata shërbejnë vetëm për të frikësuar opinionin publik”, deklaroi presidenti kroat.

Ai nënvizoi se marrëveshja e bashkëpunimit në fushën e sigurisë dhe mbrojtjes, e nënshkruar nga ministri kroat i Mbrojtjes Ivan Anushiq me homologët nga Shqipëria dhe Kosova, ka karakter ekskluzivisht mbrojtës dhe synon forcimin e stabilitetit dhe bashkëpunimit rajonal.

Milanoviq kritikoi gjithashtu retorikën e tensionuar që po përdoret në disa qarqe politike europiane, duke paralajmëruar se deklaratat e papërgjegjshme mund të rrisin pasigurinë në kontinent.

Duke folur për rolin e NATO-s, ai riafirmoi përkushtimin e Kroacisë ndaj aleancës dhe sigurisë kolektive, por theksoi nevojën për maturi dhe përgjegjësi politike në kohë krizash ndërkombëtare.

Presidenti kroat dënoi agresionin rus ndaj Ukrainës, ndërsa bëri thirrje për respektim të së drejtës ndërkombëtare në të gjitha konfliktet globale.

“Shtetet e vogla mbrohen më së miri nga respektimi i ligjit ndërkombëtar dhe dialogu diplomatik”, përfundoi Milanoviq.