Hajdari: 16 kompani austriake duan të investojnë në Kosovë.

Ministrja e Industrisë, Ndërmarrësisë dhe Tregtisë, Rozeta Hajdari, ka thënë se 16 kompani austriake janë të interesuara për të investuar në industrinë e metaleve.

Në një intervistë për “Ekonominë Online”, ajo ka thënë se iu mbetet institucioneve të vendit që të garantojnë lehtësira për investitorët e huaj.

“Ato kanë plane më të mëdha për të investuar në Kosovë, por ne duhet të lehtësojmë edhe legjislacionin e të bërit biznes kryesisht ligjin për investime të huaja dhe për investime strategjike të cilat i kemi bashkuar në një kornizë tani dhe Ligjin për zona ekonomike që ofrojnë lehtësi dhe siguri”, ka thënë Hajdari.

Ajo ka shtuar se përpos përpunimit të metaleve është e rëndësishme të kontribohet edhe në efiçiencën e energjisë specifikisht në agjendën e gjelbër.

“Përmes politikës që jemi pikërisht duke e draftuar politikën për industri ne po fokusohemi se ku industria mund të kontribuojë sidomos në industrinë primare në këtë rast mineralet, minierat, industrinë përpunuese dhe shërbyese terciare”, ka thënë Hajdari. “Përmes sektorit privat ne shohim që mund të kontribuojë shumë ndonëse ministria e ekonomisë i ka minierat me nxjerrjen e mineraleve ne duhet të shikojmë se si t’iu shtojmë vlerën këtyre mineraleve tona e jo t’i shesim si produkte të para ose si lëndë e parë që eksportohet”.

Ditë më parë, Hajdari ka deklaruar se një kompani e huaj i ka thënë se “Kosova e ka sistemin tatimor më të mirë në botë”

Komento:

	Komenti