Ndalohet çarkullimi i trenave në Kosovë, shkak prangosja e shoferit ku vdiq e mitura në Klinë – Ora Info Ballina | ORAinfo.com - Nuk ndalet
Lajmet e fundit
0 °C

Ndalohet çarkullimi i trenave në Kosovë, shkak prangosja e shoferit ku vdiq e mitura në Klinë

08:12 | 19 Shtator 2019

Asnjë tren nuk do të qarkulloj sot, shkak arrestimi i shoferit ku vdiq e mitura në Klinë.

Kryesia e Sindikatës së Pavarur të Hekurudhave – Trainkos, ka njoftuar se të enjten nga ora 05:00 do të ndalohet qarkullimi i të gjithë trenave në vend, ku përfshihen trenat e mallrave dhe ata të udhëtarëve.

Ky vendim, sipas kësaj Sindikate, është marrë pas prangosjes të makinistit të trenit të relacionit Pejë – Prishtinë gjatë ditës së djeshme nga Policia e Kosovës pas aksidentit ku mbeti e vdekur një e mitur në Klinë.

“Me datën 18.09.2019 në ora 19:30 minuta, është mbajtur takimi i Kryesisë së SPH – Trainkos me Kryetarë të Shoqatave Sindikale, dhe merret vendimi i lartcekur, si pasojë e prangosjes/ndalimit të kolegut tonë, makinistit të trenit 4200 (relacioni Pejë – Prishtinë) të datës 17.09.2019 nga Policia e Kosovës në mënyrë të padrejtë”, thuhet në njoftimin e Kryesisë së Sindikatës.

Sipas kësaj Sindikate, me prangosjen e makinistit nuk është respektuar Ligji mbi Hekurudhat e Kosovës si dhe Rregulloret dhe Udhëzimet e tjera administrative. Ata kërkojnë nga Qeveria e Kosovës, Ministria e Infrastrukturës, Ministria e Zhvillimit Ekonomik dhe Ministria e Punëve të Brendshme, që të bëhet lirimi në mënyrë sa më të shpejtë i kolegut të tyre dhe të fillohet të respektohet Ligji mbi Hekurudhat e Kosovës.

Kryesia e Sindikatës së Pavarur të Hekurudhave – Trainkos thotë se qarkullimi i trenave do të fillojë me lirimin e kolegut të tyre nga masa e arrestit.

Ndryshe, gjatë ditës të martës, në Klinë ka vdekur një e mitur si pasojë e lëndimeve që ka marrë nga goditja e trenit.

Komento:

VËREJTJE: ORAinfo mban të drejtën e përzgjedhjes së komenteve që do të publikohen. Komentet që përmbajnë gjuhë të urrejtjes, përmbajnë sharje dhe lëndime, si dhe komentet që nuk ndërlidhen me artikullin në të cilin komentoni, nuk i publikojmë.

Ju faleminderit!