Ndeshjet e nëntorit, Kombëtarja e Kosovës merr lajme të këqija nga FIFA

13:30 | 18 Nëntor 2026

Humbja 3:0 ndaj Irlandës në Dublin të martën mbrëma dhe barazimi pa gola me Izraelin në Prishtinë të shtunën e kaluar i kanë kushtuar Kosovës me rënie në renditjen e FIFA-s.

Renditja e re e FIFA-s është publikuar të mërkurën, një ditë pasi u zhvilluan ndeshjet e fundit të edicionit të pestë të Ligës së Kombeve.

Pas rezultateve të këtij muaji, Kosova ka humbur dy pozita, duke rënë nga vendi i 76-të në të 78-tin.

Në anën tjetër, Shqipëria ka shënuar përparim në këtë renditje. Kuqezinjtë janë ngjitur për një pozitë, nga vendi i 66-të në të 65-tin.

Ndryshime nuk ka në katër pozitat e para. Spanja vazhdon të kryesojë renditjen, e ndjekur nga Argjentina në vendin e dytë, Franca në të tretin dhe Anglia në të katërtin.

Ndërkaq, Portugalia ka rënë në vendin e gjashtë, ndërsa Maroku është ngjitur në pozitën e pestë.

Komento: