Saktësisht 26 vjet më parë, NATO ka nisur fushatën ajrore ndaj caqeve të Beogradit për të parandaluar krimet dhe spastrimin etnik në Kosovë, që po kryenin forcat e Sllobodan Millosheviqit.
Edhe kaq vjet më vonë, në Beograd nuk e pranojnë se në Kosovë ka pasur krime të tmerrshme. Atje e shënojnë vetëm atë që e konsiderojnë “agresion” ndaj një shteti sovran, pa e përmendur atë që po bënin ushtria, policia dhe grupet paramilitare të sponsorisuara nga shteti ndaj shqiptarëve.
Këtë të hënë, Ministria e Punëve të Jashtme të Serbisë që udhëhiqet nga Marko Gjuriq në një postim në “X” në gjuhën serbe dhe angleze ka përkujtuar “rreth 2500 njerëz u vranë, mes tyre shumë fëmijë”, pa e përmendur atë që kishte ndodhur në “anën tjetër” mbi 13,500 qytetarë të vrarë e të zhdukur.
Postimi i plotë i MPJ’së së Serbisë:
26 vjet më parë, më 24 mars 1999, filloi agresioni ilegal i NATO-s kundër Republikës Federale të Jugosllavisë. Pa lejen e Këshillit të Sigurimit të OKB-së, një aleancë ushtarake vendosi të pozicionehet mbi ligjin ndërkombëtar, mbi drejtësinë, mbi njerëzimin. Filluan 78 ditët e shkatërrimit të pamëshirshëm të shtetit sovran, në të cilat nuk kishte drejtësi, asnjë fajtor – mbetën vetëm viktima.
U shembën spitale, shkolla, ura, monumente kulture. Njerëzit vriteshin në pragjet e tyre, në tregje, në trena, në shtretërit e spitaleve. Viktimat civile u quajtën me cinizëm “dëm kolateral”. Rreth 2500 njerëz u vranë, mes tyre shumë fëmijë.
Nuk ishte një “ndërhyrje humanitare”, por një shfaqje brutale e forcës që shënoi fillimin e shembjes së rendit juridik ndërkombëtar. Me sulmin në RF të Jugosllavisë, e drejta e forcës zëvendësoi forcën e ligjit dhe pasojat e kësaj bota po i ndjen edhe sot.
Serbia nuk ka harruar. Serbia, e cila u ekspozua ndaj agresionit në vitin 1999, sot lufton me besueshmëri të plotë morale për respektimin e ligjit ndërkombëtar, Kartës së OKB-së dhe multilateralizmit të vërtetë. Ne mbetemi konsekuent në këtë rrugë – do të jemi faktor paqeje dhe stabiliteti në rajon, por nuk do të heshtim përballë forcës dhe padrejtësisë. Viktimat tona meritojnë të kujtohen dhe bota meriton të vërtetën.
3 °C
