Gennaro Gattuso po e nis në mënyrën më të mirë aventurën e tij te Lazio. Trajneri italian ka regjistruar tri fitore në tri ndeshjet e para në Serie A, ndërsa tashmë përballë tij vjen një kundërshtar i veçantë: AC Milan.
Lazio ka surprizuar në startin e sezonit, duke marrë maksimumin e pikëve në tri javët e para të kampionatit. Pas fitoreve minimale 1-0 ndaj Bolognës dhe Genoas, skuadra e Gattusos triumfoi 2-1 në transfertë ndaj Udineses, të hënën në mbrëmje.
Me nëntë pikë të grumbulluara, Lazio i bashkohet Interit dhe Romës si skuadrat që kanë fituar të gjitha ndeshjet e para të sezonit në Serie A, transmeton ORAinfo.
Megjithatë, sfida e radhës do të ketë një ngarkesë të veçantë emocionale për Gattuson. Të shtunën në mbrëmje, në “Stadio Olimpico”, Lazio do të përballet me Milanin, klubin ku ish-mesfushori italian ka kaluar një pjesë të rëndësishme të karrierës së tij.
Pas fitores ndaj Udineses, Gattuso foli për përballjen me ish-klubin e tij dhe pranoi se Milani mbetet një klub shumë i veçantë për të.
“Jam rritur në një familje tifozësh të Milanit dhe për mua gjithçka që bëra atje ishte gjithmonë një burim krenarie. E ndieja gjithçka kur vishja atë fanellë”, u shpreh Gattuso.
“Për mua, AC Milan ka qenë gjithmonë një ëndërr. Edhe tani nuk mund ta harroj gjithë dashurinë dhe gëzimin që ndiej për këtë klub. Por shpresoj të marr disa pikë ndaj ekipit tim të preferuar”, shtoi trajneri i Lazios.
Gattuso ka gjithashtu një lidhje të fundit me Milanin përmes mbrojtësit Mario Gila. Trajneri italian ka zbuluar më herët se kishte mbështetur transferimin e mbrojtësit nga Lazio te Milani gjatë merkatos së verës.
Tashmë, Gattuso do të përpiqet të lërë mënjanë emocionet dhe të vazhdojë serinë perfekte në kampionat, edhe pse përballë do të ketë klubin që ai e konsideron ende si një nga dashuritë më të mëdha të karrierës së tij. /ORAnfo/
25 °C
