Gruaja ishte pa simptome COVID-19, por dyshohet se infektoi 98 persona në një klub nate në Pragë.
Numri i njerëzve pozitivë me coronavirus të cilët kanë lidhje me një klub nate në Pragë është rritur në 98, dhe në mesin e tyre janë futbollistë nga tre klube të mëdha të Pragës!
Kjo është vetëm një valë e re e madhe e njerëzve që vuajnë nga COVID-19 në Republikën Çeke, shkruan The Guardian.
Gjatë ditës së sotme u raportuan 247 raste të reja, që është numri më i madh që nga fundi i qershorit. Si rezultat, kryeministri çek, Andrej Babis, deklaroi se “mbajtja e maskës mund të jetë e detyrueshme sërish në disa hapësira të mbyllura”.
Zyrtarët shëndetësorë dyshojnë se një grua, pa simptoma, është burimi i infeksionit që u përhap më 11 korrik pas një feste në një klub nate në Pragë, transmeton Telegrafi.
Autoritetet e këtij vendi deklaruan se 68 persona prej mbi njëqind njerëzish që ishin në klubin e natës, shtatë punonjës, si dhe 23 anëtarë të familjeve së saj u testuan pozitivë me COVID-19. Në total, 273 persona janë në karantinë.
Pasi mediat shkruanin se njerëzit në klub u infektuan duke shpërndarë pije, zyrtarët përsëritën rëndësinë thelbësore të distancës fizike.
Sidoqoftë, përkundër rritjes së rasteve ditore në javët e fundit, numri i të shtruarve në spital është vetëm paksa (141 raste), që është një e treta e numrit gjatë valës së infeksionit në prill. Zyrtarisht, gjithsej 14,570 njerëz janë testuar pozitivisht me COVID-19, dhe 364 njerëz vdiqën.
-4 °C
