Al Ittihad nuk e ka ndërmend të heq dorë nga Paul Pogba.

Klubi nga Arabia Saudite ia kishte bërë një ofertë të majme mesfushorit francez, të cilit ia kishte vendosur në pjatë një kontratë trevjeçare me 30 milionë euro neto në vit.

Mirëpo, futbollisti i Juventusit e kishte refuzuar këtë ofertë.

E tash, mediumi italian “Tuttosport” shkruan se klubi që i transferoi Karim Benzeman dhe N’Golo Kanten po planifikon ta rrisë ofertën e tij vetëm për ta bindur ish-futbollistin e Manchester Unitedit të pranojë të transferohet në Saudi Pro League.

Në Arabinë Saudite afati kalimtar i verës do të zgjasë deri më 20 shtator, tri javë pas atij në futbollin evropian, kështu që klubi arab do të ketë kohë të bollshme për ta bindur përfaqësuesin francez që të përfundojë në këtë klub.

Juventusi është i gatshëm ta shesë lojtarin për një shifër të arsyeshme pasi ka mbetur i dëshpëruar me kontributin e tij zero në sezonin e parë pasi u rikthye nga Anglia.

Lojtarin e përshkuan lëndimet në edicionin 2022/23 dhe kjo ka bërë që klubi arab të jetë paksa i shqetësuar për gjendjen e tij fizike.

Komento:

	Komenti