Odat ekonomike thonë se bizneset private po pengohen në punë – Ora Info Ballina | ORAinfo.com - Nuk ndalet

Odat ekonomike thonë se bizneset private po pengohen në punë

13:10 | 16 Mars 2020

Odat ekonomike thonë se bizneset private po pengohen në punë.

Oda Ekonomike e Kosovës dhe Oda Ekonomike Amerikane në Kosovë kanë shprehur shqetësimin e tyre, lidhur me siç thonë ata, pengimin e punës së veprimtarive ekonomike anembanë vendit.

Përmes një komunikate për media, bëhet e ditur se kjo është në kundërshtim me vendimin e djeshëm të Inspektoratit të Tregut i cili, sipas tyre, në mënyrë të qartë cek veprimtaritë ekonomike të cilat mund të vazhdojnë punën edhe pas marrjes së masave parandaluese kundër pandemisë COVID-19.

Ata thonë se veprimet e tilla arbitrare ndikojnë në rritjen e konfuzionit të shkaktuar ditëve të fundit, por edhe në rritjen e pakontrolluar të panikut nga ana e qytetarëve.

“Kryetari i Odës Ekonomike të Kosovës Berat Rukiqi dhe Drejtori Ekzekutiv i Odës Ekonomike Amerikane në Kosovë Arian Zeka janë takuar me Kryeinspektorin e Tregut Lulzim Syla për të përcjellë këto shqetësime të bizneseve dhe rëndësinë e mosndërprerjes së veprimtarisë ekonomike, për shkak të pasojave të cilat kjo mund të ketë në ekonominë e vendit. Kryeinspektori Syla në anën tjetër konfirmoi se vendimi i djeshëm i shpërndarë përmes një qarkoreje të Inspektoratit të Tregut mbetet ende i vlefshëm”, thuhet në njoftim.

Oda Ekonomike e Kosovës dhe Oda Ekonomike Amerikane në Kosovë iu kanë bërë thirrje autoriteteve komunale, Policisë së Kosovës, si dhe të gjitha trupave inspektuese që të respektojnë vendimin e Qeverisë së Republikës së Kosovës dhe Inspektoratit të Tregut dhe të mos ndërhyjnë në mënyrë arbitrare duke penguar punën e ndërmarrjeve private.

“Po ashtu, Oda Ekonomike e Kosovës dhe Oda Ekonomike Amerikane në Kosovë kërkojnë nga Qeveria e Kosovës që të aprovojë vendimin për planin e masave që do të lehtësonin operimin e bizneseve në këto ditë të situatës emergjente, sipas propozimit të bërë gjatë ditës së djeshme. Në anën tjetër, të dyja institucionet thërrasin ndërmarrjet tregtare që të veprojnë gjithashtu me përgjegjshmëri duke mos abuzuar me ngritjen e çmimeve në këto ditë të vështira”, thuhet në njoftim.

Komento: