Presidentja e Kosovës, Vjosa Osmani, po vazhdon të qëndrojë në Shtetet e Bashkuara të Amerikës.

Ajo ka mbajtur një fjalim Kolegjin e Luftës Detare të Shteteve të Bashkuara të Amerikës..

Fjalimin Osmani e shpërndau në rrjetin e saj në Facebook, të hënën.

“Sot, në U.S. Naval War College, para qindra pjesëtarëve të forcave detare, shumë prej të cilëve kishin shërbyer në vitin 1999 gjatë intervenimit të NATO-s në Kosovë, dhe shumë të tjerë si studentë sot e kontribues për paqen dhe sigurinë globale nesër. Jam mirënjohëse ndaj Sekretarit amerikan të Marinës për ftesën që të flas sot në Simpoziumin Ndërkombëtar për Gratë, Paqen dhe Sigurinë”, ka shkruar Osmani.

Gjatë fjalimit Osmani, ka thënë se Kosova është vendi më pro-amerikan në botë, duke shprehur krenari për këtë.

“Nuk ka popuj të tjerë në botë sikur ai i Kosovës, që kanë dashuri dhe respekt e që shprehin mbështetje kaq të madhe për Shtetet e Bashkuara të Amerikës. Me krenari e themi se jemi vendi më pro amerikan në tokë”, ka thënë Osmani, teksa kjo fjali u përcoll me duartrokitje.