Presidenca tregon çka bisedoi Osmani me sekretarin e NATO-s.
Presidentja e Kosovës, Vjosa Osmani, gjatë vizitës në New York ka takuar sekretarin e Përgjithshëm të NATO -s, Jens Stoltenberg, ndërsa theksoi se qëllimi strategjik i Kosovës mbetet anëtarësimi në komunitetin euroatlantik.
Osmani tha se Kosova është mirënjohëse për mbështetjen e vazhdueshme të NATO-s në ruajtjen e stabilitetit dhe paqes.
“Anëtarësimi në Bashkimin Evropian dhe NATO do të kontribuojë në rritjen e sigurisë dhe stabilitetit në rajon dhe e cilësoi anëtarësimin në këtë organizatë, prioritet shtetëror të Kosovës, si një parakusht për sigurimin e paqes në rajon, ashtu edhe për promovimin dhe mbrojtjen e vlerave të përbashkëta”, citohet të ketë thënë presidentja.
Po ashtu Osmani tha se këtij hapi duhet t’i paraprijë përfshirja e Kosovës në Partneritetin për Paqe.
Në këtë kontekst, e përmendi faktin se Forca e Sigurisë së Kosovës, e cila po zhvillohet në përputhje me standardet e NATO-s, do t’ia mundësojë Kosovës një rol aktiv në kuadër të sigurisë rajonale dhe globale.
Sa i përket agresionit të Rusisë në Ukrainë, presidentja Osmani tha se Kosova ka dënuar luftën e paprovokuar të Putinit kundër Ukrainës dhe se është plotësisht në linjë me sanksionet e BE-së dhe SHBA-së kundër Rusisë.
Në këtë drejtim, Osmani ka theksuar nevojën e bashkërendimit të shteteve demokratike në rajon me NATO-n për të siguruar një mjedis të sigurt dhe për të ndaluar veprimet destabilizuese të Rusisë dhe satelitëve të saj.
2 °C
