Akuza të rënda ndaj kryeministrit Albin Kurti ka hedhur presidentja Vjosa Osmani në fjalimin vjetor të së enjtes në Kuvendin e Kosovës. Pika më e rëndësishme e fjalimit të saj ishte potencimi se është luajtur “bixhoz” me aleancat e Kosovës.
“Aleancat janë këtu për na të na mbrojtur, prandaj vënia në rrezik e tyre, lujtja bixhoz me to apo cenimi i tyre e cenon vet mbrojtjen e Republikës tonë. Shihni deklaratat e liderëve të superfuqive botërore, do të shihni qindra deklarata e fjalime se si çdo sfidë angazhohen ta kalojnë me aleatë, sepse nuk mund të ia dalin vetëm”, tha ndër të tjera Osmani në fjalimin e së enjtes.
Por, për ish-presidentin e Kosovës, njëherit kreun e subjektit politik Aleanca Kosova e Re (AKR), Behgjet Pacolli, jo vetëm Kurti, por edhe Osmani ka luajtur bixhoz me të ardhmen e Kosovës.
Pacolli në një intervistë për portalin “FrontOnline” thotë se Kurti dhe Osmani për këto vite të qeverisjes me Kosovën kanë zgjedhur një agjendë politike, siç tha ai, egoiste dhe izolacioniste.
‘’Si Vjosa Osmani ashtu edhe Albin Kurti kanë luajtur pamatur bixhoz me të ardhmen e Kosovës. Në vend që të nxisin një qasje të unifikuar dhe strategjike, ata kanë ndjekur një agjendë politike egoiste dhe izalocioniste, e cila e ka shtyrë Kosovën më tej në një gremine në skenën globale”, është shprehur Pacolli në intervistën për Front Online.
Sipas tij, historia do t’i kujtojë ata si arkitektë të kësaj rënieje, por fatkeqësisht, siç thotë ai, çmimin e dështimeve të tyre po e paguan populli i Kosovës.
“Ky fjalim, në veçanti, thekson një largim nga përgjegjësia. Në vend që të reflektonte mbi rolin e saj ose të paraqiste një qasje koherente, Presidentja zgjodhi të shmangej përgjegjësisë dhe të kritikonte. Në fund të fundit, deklarata të tilla bëjnë pak për të frymëzuar besim ose për të ofruar një rrugë përpara’’, shprehet Pacolli për FrontOnline.
Behgjet Pacolli: Fjalimi i Osmanit, pjesë e dramës pasi që e kuptoi se Kurti mund të mos e mbështesë një mandat të dytë të saj
Pacolli thotë se fjalimi i presidentes Osmani pasqyron një moment kyç të ri pozicionimit politik pas katër viteve, pasi Kosova, sipas tij, përjetoi dështime të mëdha dhe pas izolimit diplomatik që iu bë Kosovës me këtë Qeveri.
’’Fjalimi i Presidentes pasqyron një moment kyç të ri pozicionimit politik pas afro katër vitesh që Kosova po përjetoi dështime të mëdha. Nën këtë qeverisje, ne e kemi parë Kosovën të izoluar diplomatikisht, shtetin e kapur nga centralizimi i pushtetit nga kryeministri Albin Kurti, varfëria në rritje që ka ndikuar drejtpërdrejt në cilësinë e jetës së qytetarëve dhe sulme të vazhdueshme ndaj lirisë së medias. Në vend që të ofrojë një plan kuptimplotë për të adresuar këto çështje, Presidentja ka zgjedhur të ridrejtojë fajin, duke e portretizuar veten si një zë i përgjegjshmërisë’’, thotë ai për FrontOnline.
Ish i pari i shtetit të Kosovës, Behgjet Pacolli, për FrontOnline, thotë se megjithëse fjalimin e Presidentes Osmani, veprimet dhe retorika e saj nuk janë pa faj.
‘’Megjithatë, veprimet dhe retorika e saj nuk janë pa faj. Gjatë gjithë mandatit të saj, Presidentja ka kërkuar në mënyrë aktive të marrë meritat si drejtuese e politikës së jashtme të Kosovës, duke shfrytëzuar rolin për të rritur imazhin e saj kur i shërbeu politikisht. Tani, duke u përballur me pasojat e qeverisjes së dobët dhe politikave të dështuara, ajo ka zgjedhur të drejtojë gishtin drejt qeverisë. Ndërsa është e vërtetë që qeveria mban përgjegjësi të konsiderueshme, po ashtu edhe Presidentja’’, shprehet ai.
Pacolli potencon se fjalimi i Presidentes Osmani dhe kritikat e saj ndaj Qeverisë kanë të ngjajnë më shumë se Osmani nuk e ka mbështetjen e Kurtit për t’u bërë presidente edhe për një mandat dhe për këtë, sipas tij, Osmani ka zgjedhur të distancohet nga Qeveria e tij.
‘’Koha e këtij fjalimi nuk është aspak e rastësishme – është një lëvizje e llogaritur e rrënjosur në vetë-ruajtjen politike. Presidentja është shumë e vetëdijshëm se Albin Kurti ka të ngjarë të mos mbështesë kandidaturën e saj për një mandat të dytë, dhe si rezultat, ajo ka zgjedhur të distancohet nga qeveria e tij duke u përpjekur të pozicionohet si një figurë e pavarur politike”, shprehet Pacolli, duke shtuar se ky ndryshim nuk ka të bëjë me Kosovën apo qytetarët e saj; ka të bëjë me mbijetesën e saj politike. Ne duhet ta shohim këtë fjalim si pjesë të një drame më të gjerë që ka të bëjë më pak me shtetin dhe më shumë me teatrin politik. Me afrimin e fundit të mandatit të saj, mund të presim një rritje të shfaqjeve të tilla publike, të krijuara për të krijuar përshtypjen se ajo është e ndarë nga dështimet e qeverise aktuale’’, shton ai.
Shefi i AKR-së: Lidershipi aktual i Kosovës i ka prioritizuar interesat e veta mbi ato të kombit
Pacolli, thotë se partneriteti Kurti-Osmani ka dëshmuar të meta dhe është karakterizuar me vendimmarrje të dobët.
‘’Megjithatë, realiteti është se ajo ka qenë pjesë e pandarë e kësaj qeverisje, si aleate e ngushtë e Kurtit. Së bashku, ata dikur u përshëndetën si ekipi udhëheqës më i koordinuar në historinë e re të Kosovës. Megjithatë, partneriteti i tyre është dëshmuar me të meta të thella, i karakterizuar nga vendimmarrja e dobët, mungesa e llogaridhënies dhe politikat që kanë dëmtuar pozitën e Kosovës si brenda dhe jashtë vendit. Fjalimi thekson gjithashtu një ndryshim në tonin, një ndryshim që synon të tërheqë ata që janë të zhgënjyer me qeverinë aktuale’’, thotë ai.
Pacolli, potencon se dëmet kanë ndodhur dhe se deklaratat e Osmanit janë të vonuara.
‘’Megjithatë, këto deklarata vijnë shumë vonë për të riparuar dëmet e bëra tashmë. Në vend që të ndërmarrë veprime kuptimplota gjatë katër viteve të fundit, Presidentja tani po angazhohet në zhvendosjen e fajit, duke u përpjekur të rishkruajë rolin e saj në dështimet e kësaj qeverisje. Ndërsa dikur dukeshin si një front i bashkuar, veprimet e tyre të fundit sugjerojnë një ndarje në rritje që ka të bëjë më shumë me oportunizmin politik sesa me shqetësimin e vërtetë për të ardhmen e Kosovës. Ndërsa ky teatër politik vazhdon të zhvillohet, është populli i Kosovës ai që ka mbetur në barrë të pasojave të një lidershipi që i ka prioritizuar interesat e veta mbi ato të kombit’’ u shpreh për FrontOnline, ish-presidenti i Kosovës, Behgjet Pacolli.
/FrontOnline/
-2 °C
