Doktor Fauci ka paralajmëruar në lidhje me variantet COVID-19.

Varianti Omicron ka të ngjarë të jetë më pak i rëndë se varianti Delta, i cili mbetet problemi i vërtetë për amerikanët këtë dimër, deklaroi Fauci, këshilltari kryesor mjekësor i presidentit amerikan, Joe Biden.

Në një intervistë Fauci tha se vendi “po shikon tashmë një rigjallërim të rasteve” dhe paralajmëroi se “60 milionë amerikanë janë ende të pavaksinuar”.

“Unë mendoj se tashmë kemi mjaft probleme me Deltan. Njerëzit vazhdojnë të flasin për një valë dimri me Omicron, ne ende kemi mbi 100 000 raste në ditë”, theksoi ai duke iu referuar variantit Delta.

“Ne kemi rreth 50 000 njerëz në spital. Kemi afro 1 400 vdekje në ditë. Unë mendoj se ne duhet të fokusohemi më shumë në atë se cili është problemi ynë i vërtetë dhe problemi ynë i vërtetë është Delta”, shtoi ai.

Duke parashikuar një valë dimërore të rasteve me COVID-19, Fauci tha se ishte “e pashpjegueshme” që një pjesë kaq e madhe e popullsisë të mos ishte vaksinuar.

“Është vërtet një turp dhe një koment i trishtuar për vendin tonë që kemi tashmë mbi 780 000 viktima amerikane dhe kemi ende njerëz që refuzojnë të vaksinohen”, theksoi ai.

“Kemi 60 milionë njerëz në këtë vend që refuzojnë të vaksinohen. Dua të them, është vërtet, me të vërtetë rrëqethëse”, shtoi ai.

Komento:

	Komenti