Parashikimet e para afatgjata për dimrin 2026/2027 sinjalizojnë një sezon me temperatura më të buta dhe më pak borë se mesatarja në pjesën më të madhe të Evropës, përfshirë edhe Ballkanin.

Sipas modeleve sezonale ECMWF dhe UKMO, zhvillimi i fenomenit El Niño pritet të ndikojë në qarkullimin atmosferik dhe shpërndarjen e sistemeve të presionit gjatë muajve të dimrit.

Një zonë e fuqishme e presionit të lartë në jug të Evropës dhe presioni më i ulët në veri mund të favorizojnë depërtimin e ajrit më të butë nga Atlantiku. Kjo do t’i zvogëlonte mundësitë për reshje të qëndrueshme bore, veçanërisht në zonat e ulëta të Evropës qendrore, perëndimore dhe jugore.

Sipas “Severe Weather Europe”, nëntori dhe dhjetori mund të sjellin një fillim të ngadalshëm të sezonit të borës. Në dhjetor, reshje nën mesataren parashikohen në pjesën më të madhe të kontinentit, ndërsa kushte më të favorshme priten në zonat malore dhe në veri.

Një prirje e ngjashme parashikohet edhe për janarin dhe shkurtin. Nëse vazhdon qarkullimi i butë perëndimor, shkurti mund të shënojë deficitin më të madh të reshjeve të borës.

Për Ballkanin, parashikimet nënkuptojnë se krijimi i një shtrese të qëndrueshme bore në ultësira mund të jetë më i vështirë. Megjithatë, nuk përjashtohen periudha të shkurtra me temperatura të ulëta dhe reshje bore.

Situata pritet të jetë më e favorshme në zonat malore, ku temperaturat më të ulëta mund të mundësojnë reshje dhe qëndrueshmëri më të madhe të borës.

Ekspertët theksojnë se bëhet fjalë për parashikime sezonale shumë të hershme dhe jo për një skenar përfundimtar. Dinamika atmosferike mund të ndryshojë ndjeshëm deri në fillimin e dimrit.

Komento:

	Komenti