Ish-konkurrenti i Big Brother VIP Kosova 4, Nailiri, ka ndarë edhe një herë publikisht dhimbjen dhe ngushëllimet e tij për familjen e Shpat Kasapit, pasi lajmi për vdekjen e këngëtarit të njohur e ka prekur thellë.

Ai rrëfeu se momenti kur mësoi për humbjen e papritur ka qenë tepër i rëndë për të, duke theksuar se përveç raportit profesional që kishin pasur së fundmi përmes një interviste, mes tyre ekzistonte edhe një lidhje miqësore e krijuar nga koha kur jetonin në të njëjtin pallat në Tiranë.

Nailiri kujtoi me mall ditët kur takoheshin çdo mëngjes për të pirë kafe, si dhe seancat e shumta në palestër ku ushtronin së bashku, duke shtuar se këto momente tani marrin një tjetër vlerë, sepse mbeten kujtime të një personi që nuk është më.

Ai u ndal edhe te videoja që u bë virale në rrjet, ku disa nga banorët e shtëpisë këndonin këngët e Shpatit, ndërsa Labi, konkurrenti më i ri i spektaklit, gjendej në një situatë të vështirë, pasi e dinte lajmin tragjik, por nuk mund ta shprehte për shkak të rregullave të lojës.

Nailiri tha se dhimbja e Labit dukej qartë në fytyrën e tij, sidomos në mënyrën se si përpiqej të përqendrohej dhe të kontrollonte emocionet, duke pasur parasysh se po dëgjonte këngët e një artisti që sapo kishte humbur jetën.

Vdekja e Shpat Kasapit në moshën vetëm 40-vjeçare, si pasojë e një sulmi në zemër, ka tronditur publikun, miqtë dhe njerëzit e afërt të tij.

Për shumë prej tyre, përfshirë Nailirin, lajmi mbetet i pabesueshëm dhe i dhimbshëm, duke lënë pas kujtimin e një artisti të dashur dhe një njeriu të sjellshëm që ka prekur me muzikën dhe karakterin e tij shumë njerëz./ORAinfo/

Komento:

	Komenti