Për shkak të grevës, ja çka pritet të ndodh nesër në aeroport – Ora Info Ballina | ORAinfo.com - Nuk ndalet

Për shkak të grevës, ja çka pritet të ndodh nesër në aeroport

19:21 | 14 Shkurt 2019

Vazhdon greva në aeroportin e Prishtinës.

Për rreth katër orë në Kullën e Trafikut Ajror në Agjencinë e Shërbimit të Navigimit, ka mbretëruar qetësia, raporton KTV.

Vetëm një aeroplan ushtarak ka aterruar në pistën e Aeroportit Ndërkombëtar të Prishtinës, kjo pasi të 22 kontrollorët e këtij institucioni kanë mbajtur grevën e dytë të tyre, kësaj radhe katërorëshe.

Grevës së tyre i janë bashkuar edhe punëtorët e tjerë të ASHNA-së.

Pak para mesditës, Aeroporti “Adem Jashari” është vërshuar nga udhëtarët, fluturimet e të cilëve janë shtyrë për disa orë.

Por, shtyrjet nuk i kanë bezdisur udhëtarët, shumica e të cilëve kanë thënë se janë njoftuar me kohë për grevën.

Driton Hyseni, menaxher i planifikimit të fluturimeve në ANP, ka theksuar se gjendja ka qenë e menaxhueshme, porse komplikime mund të ketë nëse greva vazhdon.

Kontrollorët janë të bindur në vazhdimin e veprimeve të tyre sindikale, deri në largimin e ASHNA-së nga Ligji i Pagave, pasi, sipas tyre, i është marrë pavarësia që e kishte.

Autoriteti i Aviacionit Civil të Kosovës, u ka bërë thirrje kontrollorëve të trafikut ajror që ta ndërpresin grevën.

Autoriteti ka bërë të ditur se i ka njoftuar të gjitha kompanitë ajrore për orarin e grevës, derisa ka shprehur keqardhjen që kontrollorët kanë vendosur të vazhdojnë grevën

Komento: