Departamenti amerikan i Drejtësisë të shtunën bëri publike një aktakuzë të pavulosur kundër presidentit të rrëzuar të Venezuelës, Nicolas Maduro, së bashku me bashkëshorten e tij Cilia Flores, djalin e tij Nicolás Maduro Guerra dhe zyrtarë të tjerë venezuelanë.

Në aktakuzë, prokurorët federalë në New York pretendojnë se “për më shumë se 25 vjet, udhëheqësit e Venezuelës kanë abuzuar me pozitat e tyre të besimit publik dhe kanë korruptuar institucione dikur legjitime për të importuar tonelata kokaine në Shtetet e Bashkuara”.

Maduro ishte “në ballë të atij korrupsioni”, thuhet në aktakuzë, dhe përdori “autoritetin e tij të fituar në mënyrë të paligjshme dhe institucionet që ai i kishte gërryer për të transportuar mijëra tonë kokainë drejt Shteteve të Bashkuara”.

Sipas aktakuzës, Maduro, në role të ndryshme qeveritare, u ka dhënë trafikantëve të drogës pasaporta diplomatike venezuelane, ka ofruar mbulim diplomatik për avionët e përdorur për të pastruar para nga droga nga Meksika në Venezuelë, dhe bashkëpunëtorët e tij “janë bërë partnerë me disa nga trafikantët e drogës dhe narkoterroristët më të dhunshëm dhe më aktivë në botë” për përfitim personal.

Flores akuzohet, ndër të tjera, se ka pranuar “qindra mijëra dollarë ryshfet për të ndërmjetësuar një takim midis një trafikanti droge në shkallë të gjerë dhe drejtorit të Zyrës Kombëtare Kundër Drogës të Venezuelës” në vitin 2007.

Ndërsa dyshohet se kanë trafikuar kokainë midis viteve 2004 dhe 2015, Maduro dhe Flores së bashku “urdhëruan rrëmbime, rrahje dhe vrasje kundër atyre që u detyroheshin para droge ose që në ndonjë mënyrë minonin operacionin e tyre të trafikimit të drogës, përfshirë urdhërimin e vrasjes së një bosi lokal droge në Karakas, Venezuelë”, thuhet në aktakuzë.

Maduro akuzohet për katër pika: komplot për narkoterrorizëm, komplot për importimin e kokainës, posedim të mitralozëve dhe mjeteve shkatërruese, si dhe komplot për posedimin e mitralozëve dhe mjeteve shkatërruese.

Flores përballet me akuza për komplot për importimin e kokainës, posedim të mitralozëve dhe mjeteve shkatërruese, si dhe komplot për posedimin e mitralozëve dhe mjeteve shkatërruese.