Është bërë përurimi i objektit të ri të ambulancave specialistike në QKUK.

Kryetari i PDK-së, Kadri Veseli, i shoqëruar nga ministri i Shëndetësisë dhe i sapozgjedhuri kryetar i degës së PDK-së në Prishtinë, Uran Ismaili, përuruan sot objektin e ri të ambulantave të reja specialistike në QKUK.

Duke përgëzuar ministrin Ismaili dhe drejtorin e QKUK-së për dinamikën e dhënë ndryshimeve pozitive në sistemin e shëndetësisë, kryeparlamentari Veseli tha se shërbimet shëndetësore duhet të përmirësohen edhe më tej, njëkohësisht, duke i qëndruar afër personelit shëndetësor.

Kreu i PDK-së përgëzoi stafin shëndetësor për përkushtimin e tij për t’iu gjendur afër qytetarëve dhe për t’u ofruar shërbime sa më të mira.

“Ne të tjerëve, mua dhe ministrit në veçanti, na takon të bëjmë edhe më shumë. Kemi bërë diçka, nuk mund të mohohet dhe këto ndryshime pozitive duhet të përkrahen. Por duhet bërë edhe më shumë, për faktin se si shtet dhe si shoqëri ende nuk jemi aty ku duam. Ende jemi prapa në ofrimin e shërbimeve për qytetarët, duke zvogëluar sorollatjet e shpenzimet e tyre”, theksoi Veseli.

Ministri i Shëndetësisë, Uran Ismaili, nga ana e tij, tha se sot po shihet një pasqyrë e asaj çfarë dëshirohet të jetë në shëndetësinë kosovare gjithandej Kosovës, e jo vetëm në QKUK.

Ministri i Shëndetësisë kujtoi kohën kur qytetarët detyroheshin të merrnin shërbime nëpër bodrume, në kushte të tmerrshme për pacientin, e gjithashtu denigruese për profesionistët shëndetësorë.

“Ajo që shohim sot këtu është një nivel krejt tjetër i shërbimeve. Përpos që jepen shërbimet më moderne dhe zvogëlohet koha e pritjes, kemi edhe rritje të shërbimeve. Dikur këto ambulanta specialistike kanë pasur rreth 250 pacientë në ditë, ndërsa sot i kanë 800-1000 sish. Pra, po kthehet besimi në institucionet publike shëndetësore. Shërbimet e këtij standardi do të shtrihet edhe nëpër spitalet dhe qendrat e tjera”, tha ministri Uran Ismaili.

Komento:

	Komenti