Së shpejti do të bëhet përzgjedhja e Kryeprokurorit të Prishtinës.

Këshilli Prokurorial i Kosovës është pajtuar që procesin e përzgjedhjes së Kryeprokurorit të Prokurorisë Themelore të Prishtinës ta monitorojnë së bashku me Ambasadën Britanike në Kosovë.

Kjo është bërë e ditur nga zyra për media e Ambasadës së Britanisë së Madhe në Prishtinë.

Përfshirja e drejtpërdrejtë e kësaj ambasade do të bëhet me qëllim që procesi të jetë i drejt, transparent dhe të respektohet meritokracia.

“Këshilli Prokurorial i Kosovës ka rënë dakord që Ambasada Britanike të përfshihet drejtpërdrejtë nga fillimi i këtij procesi të rekrutimit, për të ndihmuar dhe siguruar që të jetë i drejtë, trasnparent dhe meritokratik”, thuhet në njoftim për media.

Për këtë çështje nesër do të organizohet edhe një konferencë për media, ku do të tregohet për procesin e rekrutimit për pozitën e Kryeprokurorit të Prokurorisë Themelore në Prishtinë, duke ftuar të gjithë ata që plotësojnë kriteret të bëhen pjesë e kësaj gare.

Ambasada Britanike e Kosovës ka participuar edhe në procesin e zgjedhjes së Sekretarit Ekzekutiv të Agjencisë për Krahasim dhe Verifikim të Pronës, por është zhgënjyer me vendimin e deputetëve të Kuvendit të Kosovës, që të mos e votojnë asnjërin prej emrave të propozuar nga Ambasada.

Ky veprim, sipas Ambasadës, ishte shkelje e pastër e Memorandumit të Mirëkuptimit mes Ambasadës Britanike dhe Kuvendit të Kosovës.

Komento:

	Komenti