Petkoviq i reagon Kurtit: Është gënjeshtër që s’paguhet rryma në veri – Ora Info Ballina | ORAinfo.com - Nuk ndalet

Petkoviq i reagon Kurtit: Është gënjeshtër që s’paguhet rryma në veri

23:41 | 19 Janar 2022

Drejtori i Zyrës për Kosovën në qeverinë serbe, Petar Petkoviq, ka thënë se kryeministri i Kosovës, Albin Kurti, tentoi që “të shtrojë një tezë të rrejshme se kinse rryma në veri të Kosovës s’paguhet për vite”.

Ai ka thënë se për këtë çështje faktet flasin të kundërtën.

“Absolutisht çdo kilovat rrymë e konsumuar gjatë gjithë këtyre viteve është paguar siç duhet, sepse Beogradi zyrtar dhe EPS-ja kanë paguar energjinë elektrike, që ka ardhur në katër komuna në veri të Kosovës, përmes sistemeve të transmetimit EMS deri në fillim të vitit 2021”, ka thënë ai.

“Pra, bëhet fjalë për energjinë elektrike të Republikës së Serbisë, përmes së cilës, Beogradi e furnizoi veriun e Kosovës, që nga momenti kur Prishtina, para një dekade, ia ndërpreu furnizimin me energji elektrike veriut, gjë që mund të çojë në një katastrofë humanitare”.

Petkoviq thotë se institucionet e Kosovës e kanë përgjegjësinë për situatën e krijuar, meqë “refuzojnë vazhdimisht t’i lëshojnë licencën për furnizim me energji elektrike kompanisë Electrosever”.

Ai shtoi se Prishtina ka refuzuar ta diskutojë këtë çështje gjatë raundeve të fundit të dialogut në Bruksel.

Qytetarët e pjesëve të tjera të Kosovës kanë paguar me vite për rrymën e shpenzuar në veri, ndërsa nga viti 2017, borxhet e asaj pjese janë paguar nga buxheti i Kosovës.

Komento: