Synohet takim pozitë-opozitë për marrëveshjet ndërkombëtare.
Kuvendi i Kosovës të premten do të mbajë dy seanca plenare, ku ndër të tjera deputetët e pozitës synojnë miratimin e marrëveshjeve ndërkombëtare. Lidhur me këtë, shefja e grupit parlamentar të Lëvizjes Vetëvendosje, Mimoza Kusari-Lila ka thënë se do të kërkojnë takim me shefat e grupeve parlamentare në mënyrë që të dakordohen me partitë opozitare për miratimin e marrëveshjeve ndërkombëtare.
Pas mbledhjes së sotme të Kryesisë së Kuvendit, Kusari-Lila ka thënë që synojnë një takim koordinues me partitë opozitare para seancës që do të mbahet të premten.
“Do të synojmë si pozitë që të kemi një takim koordinues paraprakisht me partitë opozitare, gjegjësisht me shefat e grupeve parlamentare, një ditë më herët në mënyrë që ajo çfarë është e rëndësishme dhe pritet nga ne si deputetë të Kuvendit, që të miratojmë marrëveshje ndërkombëtare të cilat zakonisht e kanë mbështetjen edhe të pozitës edhe të opozitës, të miratohen në seancën e 6 gushtit”, ka thënë ajo.
Shefja e deputetëve të Vetëvendosjes ka bërë të ditur që më 6 gusht seanca e parë nga ora 11:00 do të jetë vazhdim i pikave të mbetura dhe votimi i marrëveshjeve ndërkombëtare që kanë dështuar dy herë me radhë, ndërsa pas përfundimit të saj pritet të mbahet seanca e re.
“Pas përmbylljes së seancës me vazhdimin e pikave nga seancat e papërfunduara, do të fillojmë me një seancë të re të Kuvendit të Kosovës e cila përveç pikave të zakonshme të cilat janë deklarimet jashtë rendit të ditës dhe pyetjeve parlamentare, gjithashtu do të ketë në agjendë shqyrtimin e dy projektligjeve të reja të cilat vijnë në Kuvend, atë për mbrojtjen e ajrit nga ndotja dhe shqyrtimin e Projektligjit për mbeturina nga industritë nxjerrëse të mineraleve”, ka thënë ajo.
Gjithashtu, ekzekutivi i ka dorëzuar kryesisë për miratim materialin për anëtarët e propozuar për bordin e Agjencisë Kosovare të Privatizimit, për të cilën Komisioni për Ekonomi do të mblidhet nesër për t’u vendosur pastaj në rend dite më 6 gusht.
-1 °C
