OBSH-ja alarmon për rrezik global nga Omicroni
Shkencëtarët kanë thënë se mund të duhen javë për të kuptuar ashpërsinë e Omicronit, i cili u identifikua për herë të parë në Afrikën Jugore. Shfaqja e tij ka shkaktuar reagim të fortë global, me vendet që po vendosin kufizime udhëtimi dhe kufizime të tjera, të shqetësuara se mund të përhapet shpejt edhe në popullatat e vaksinuara.
Gjenevë, 29 nëntor (AP) – Varianti i ri i koronavirusit, Omicron, mbart një rrezik shumë të lartë global të rritjes së rasteve, paralajmëroi Organizata Botërore e Shëndetësisë, pasi shumë vende konfirmuan raste, duke shkaktuar mbylljen e kufijve dhe ringjallur shqetësimet për rimëkëmbjen ekonomike nga një pandemi dyvjeçare.
Shkencëtarët kanë thënë se mund të duhen javë për të kuptuar ashpërsinë e Omicronit, i cili u identifikua për herë të parë në Afrikën Jugore. Shfaqja e tij ka shkaktuar reagim të fortë global, me vendet që po vendosin kufizime udhëtimi dhe kufizime të tjera, të shqetësuara se mund të përhapet shpejt edhe në popullatat e vaksinuara.
Investitorët e trembur fshinë afërsisht 2 bilionë dollarë nga aksionet globale vetëm të premten. Tregjet financiare ishin më të qeta të hënën, edhe pasi Japonia, ekonomia e tretë më e madhe në botë, tha se do të mbyllte kufijtë e saj për të huajt.
Paralajmërimi për “pasoja të rënda”
Organizata Botërore e Shëndetësisë këshilloi 194 vendet e saj anëtare se çdo rritje e infeksioneve mund të kishte “pasoja të rënda”, por tha se asnjë vdekje e lidhur me variantin Omicron nuk ishte raportuar deri më tani.
Drejtori i përgjithshëm i OBSH-së, Tedros Adhanom Ghebreyesus, tha se shfaqja e Omicronit tregoi se sa “e rrezikshme dhe e pasigurt” ishte situata dhe u bëri thirrje ministrave të Shëndetësisë që takohen në Gjenevë për të ndjekur një marrëveshje të re për pandemitë.
Një ekspert i lartë i sëmundjeve infektive të Afrikës së Jugut tha se Omicroni duket të jetë më i transmetueshëm se variantet e mëparshme, duke përfshirë njerëzit me imunitet nga vaksinimi ose infeksioni i mëparshëm. Rastet e Afrikës së Jugut ka të ngjarë të arrijnë në 10.000 në ditë këtë javë, duke u rritur nga 2.858 të dielën dhe mezi 300 në ditë dy javë më parë, tha profesor Salim Abdool Karim.
Por ai shtoi se ishte shumë herët për të thënë nëse simptomat ishin më të rënda dhe tha se vaksinat ekzistuese të COVID-19 janë ndoshta efektive në ndalimin e Omicronit nga shkaktimi i sëmundjeve të rënda.
Të dielën, një mjek nga Afrika e Jugut, i cili ishte një nga të parët që dyshoi për një lloj të ri, tha se Omicroni deri më tani dukej se po prodhonte simptoma të buta.
Evropa në ankth
Portugalia gjeti 13 raste të variantit në një klub futbolli të Lisbonës. Skocia dhe Austria gjithashtu raportuan rastet e tyre të para të Omicronit të hënën.
Një numër vendesh kanë vendosur kufizime udhëtimi, duke përfshirë Japoninë, e cila e përshkroi ndalimin e saj për mbërritjet nga të huajt si parandaluese.
“Këto janë masa të përkohshme, të jashtëzakonshme që po marrim për hir të sigurisë, derisa të ketë informacion më të qartë për variantin Omicron”, tha kryeministri Fumio Kishida.
Ministri i Shëndetësisë, Shigeyuki Goto, tha se testet do të përcaktonin nëse një udhëtar nga Namibia ishte rasti i parë Omicron i Japonisë.
Në Izrael, ndalim për të huajt hyri në fuqi brenda natës.
Presidenti i SHBA-së, Joe Biden, do të japë detaje të reja të variantit dhe përgjigjes së SHBA-së, tha Shtëpia e Bardhë.
Agjentët e udhëtimit në Azi thanë se disa udhëtarë kishin filluar të konsideronin anulimin ose vonimin e udhëtimeve, duke kërcënuar rimëkëmbjen tashmë të brishtë të industrisë globale të turizmit. Afrika e Jugut ka denoncuar kufizimet në udhëtimet nga rajoni, duke thënë se po ndëshkohet për aftësinë e saj shkencore për t’i identifikuar variantet herët.
Vaksinimi në Afrikë, sfidë e madhe
Shkencëtari Richard Hatchett tha se shfaqja e Omicronit kishte përmbushur parashikimet se transmetimi i virusit në zonat me vaksinim të ulët do të përshpejtonte evolucionin e tij. Botsvana dhe Afrika e Jugut kanë vaksinuar plotësisht më pak se 25 për qind të popullsisë së tyre.
“Pabarazia që ka karakterizuar përgjigjen globale tani është kthyer në shtëpi”, tha Hatchet, i cili është CEO i Koalicionit për Inovacionet e Përgatitjes Epidemike (CEPI), fondacion që financon zhvillimin e vaksinave.
Me OBSH-në që u kërkon anëtarëve të përshpejtojnë vaksinimet e grupeve me prioritet të lartë, Filipinet nisën një përpjekje ambicioze për të vaksinuar nëntë milionë njerëz kundër COVID-19 në tre ditë, duke vendosur forca sigurie dhe mijëra vullnetarë.
“Omicroni ka një numër të paparë mutacionesh, disa prej të cilave janë shqetësuese për ndikimin e tyre të mundshëm në trajektoren e pandemisë”, tha OBSH-ja.
Britania, e cila tha se do të thërriste takim urgjent të ministrave të shëndetësisë të G7-s, do të paraqesë udhëzime të reja më vonë për dhënien e masave përforcuese për moshat nën 40 vjeç.
Me Francën që synon gjithashtu të përshpejtojë fushatën e saj të vaksinimit, presidenti Emmanuel Macron njoftoi se kishte marrë vaksinën përforcuese.
Më shumë se 261.17 milionë njerëz në mbi 210 vende janë raportuar të jenë të infektuar nga koronavirusi, qëkur rastet e para u identifikuan në Kinë në dhjetor 2019 dhe 5.456.515 kanë vdekur, sipas një raporti të Reutersit.
Tregjet prisnin që qeveritë dhe bankat qendrore në mbarë botën të fillonin të tërhiqnin disa prej biliona dollarëve që synonin t’i mbanin bizneset dhe familjet në këmbë gjatë pandemisë. Një tjetër valë e koronavirusit mund të nënkuptojë më shumë mbështetje.
Aksionet e dëmtuara dhe çmimet e naftës u rikuperuan pjesërisht nga shitja e së premtes, teksa tregjet u kapën pas shpresave se Omicroni do të ishte më i butë se që ishte menduar fillimisht.
2 °C
