Partitë e opozitës ka kohë që po përgatisin planin e rrëzimit të Qeverisë.
Ka një kohë të gjatë që partitë opozitare në Kosovë po synojnë të nisin një mocion për rrëzimin e Qeverisë Haradinaj.
Një nismë e para disa muajve, kishte dështuar, ndërkohë që ajo është aktualizuar sërish këto dy javët e fundit. Ditë më parë krerët e partive opozitare kanë nisur takimet për të diskutuar rreth rikthimit të mocionit të mosbesimit në Kuvend.
Për këtë qëllim, kryetari i Lidhjes Demokratike të Kosovës, Isa Mustafa ka realizuar gjatë javës së fundit takime të ndara kryetarin e Lëvizjes Vetëvendosje, Albin Kurti dhe atë të Partisë Social-Demokrate Shpend Ahmeti.
“Qytetarët duan qeverisje të re, të mirë e të drejtë dhe jo keqqeverisje që na e rrit borxhin, zhvat buxhetin dhe falimenton ndërmarrjet. U pajtuam që t’i bëjmë përgatitjet e nevojshme për rrëzimin e qeverisë”, kishte shkruar Albin Kurti pas takimit me Mustafën.
Po ashtu, edhe pas takimit me kryetarin e Partisë Social-Demokrate, Shpend Ahmeti, në njoftimet për media ishte thënë se ka dakordim për hapat që do të ndërmerren nga opozita për të ngritur mocionin e mosbesimit ndaj Qeverisë dhe dërguar vendin në zgjedhje të parakohshme parlamentare.
Përkundër këtyre deklaratave të vazhdueshme të partive opozitare për rrëzimin e Qeverisë, partitë në koalicionin qeverisës, thonë se nuk kanë frikë nga nismat e opozitës. Kryeministri Ramush Haradinaj thotë se partitë opozitare janë të lira të nisin mocionin për rrëzimin e qeverisë që udhëheq ai.
“Është një proces legjitim i opozitës dhe mendoj që opozita po i zbaton të drejtat e veta. Votat mund të ua jap nëse e vlerësojmë. Aktualisht kemi vlerësuar të vazhdojmë të punojmë, pra të kryejmë punët e Kosovës. Ta shfrytëzojmë kohën për ato tema të cilat janë me rëndësi”, tha Haradinaj.
Ndërkaq, shefi i Grupit Parlamentar të Partisë Demokratike të Kosovës, Memli Krasniqi tha për Radion Evropa e Lirë se nisma për mocion për rrëzimin e qeverisë, është një refren i vjetër i opozitës. Sipas tij, ka rreth një vit që LDK, Vetëvendosje dhe PSD, flasin për një mocion për rrëzimin e qeverisë dhe nuk kanë as guxim e as kurajo për të bërë një gjë të tillë.
“Sikur ta kishin vërtetë seriozisht tashmë do të inicionin mocionin, sepse ligjërisht e kanë të mundshme, i kanë numrat e mjaftueshëm për të iniciuar një procedurë të tillë, por vetë fakti që ata nuk e kanë bërë këtë çështje konkrete e flasin pothuajse çdo apo çdo javë, tregon se kjo është më shumë një tentim për zhvendosje të vëmendjes nga problemet e tyre të brendshme tek një çështje tjetër, e cila realisht nuk do të konkretizohet”, thotë Krasniqi.
Edhe Bilall Sherifi, shef i Grupit Parlamentar të Nismës Social Demokrate, tha se mocioni në fjalë është vetëm një nga veprimet më të zakonshme të opozitës. Sherifi tha se lirisht partitë opozitare le të provojnë të ngritin mocion nëse i kanë numrat.
“Nganjëherë është mirë të bëjnë edhe si ushtrime demokratike të mocionit, pa marrë parasysh se cili mund të jetë rezultati në fund. Por, ajo që aktualisht mund të them është që nuk kam bindjen që janë votat për të rrëzuar qeverinë, por kjo nuk duhet të dekurajojë opozitën dhe të mos ngritë fare mocion mos-besimi ndaj qeverisë”, tha Sherifi.
Në anën tjetër, deputetja e LDK-së, Vjosa Osmani ka thënë se kanë siguruar 58 nënshkrime për rrëzimin e Qeverisë, duke shtuar tha se 58 votat e siguruara janë të partive opozitare dhe se nuk kanë kërkuar votat e Listës Serbe për ta rrëzuar Qeverinë. Për të pasur sukses një mocion për rrëzimin e Qeverisë, nevojiten 61 nga 120 votat e deputetëve të Kuvendit të Kosovës.
Tri partitë opozitare, Lidhja Demokratike e Kosovës, Lëvizja Vetëvendosje dhe Partia Socialdemokrate, i kanë gjithsej 56 deputetë në Kuvendin e Kosovës dhe për suksesin e një mocioni të mosbesimit për Qeverinë, nevojiten edhe 5 vota.
Koalicioni qeverisës e ka humbur shumicën në Kuvend nga momenti kur Lista Serbe, e cila është pjesë e Qeverisë, ka vendosur që në Kuvend të kalojë në opozitë
-5 °C
