Arabia Saudite rrit çmimin e naftës.

Industria e naftës po rikuperon disa nga humbjet e muajve fillestarë të pandemisë dhe pret përmirësim të kërkesës konsumatore. Arabia Saudite ka rritur çmimet për tregjet e saj më të rëndësishme.

Vendi i parë eksportues i hidrokarbureve në botë, Arabia Saudite, ka vendosur të rritë çmimet e naftës bruto për tregjet kryesore globale pasi pret një dalje të sektorit nga kriza prej pandemisë.
Kompania “Aramco” njoftoi se për muajin gusht një fuçi nafte për importuesit aziatikë do të kushtojë 1,2 dollarë më shtrenjtë sesa standardi i brutos në Lindjen e Mesme, dhe deri 1,65 dollarë fuçia për tregun e dytë më të madh, Shtetet e Bashkuara të Amerikës.

Nga prodhuesi shtetëror saudit i naftës dhe i gazit mësohet se çmime më të larta do të aplikohen edhe për blerësit e naftës bruto nga Evropa veriperëndimore, ndërkohë që për rajonin e Mesdheut, më të prekur prej pandemisë, kostot do të ulen me më shumë se 1 dollar fuçia.

Ndërsa një ditë më parë në bursa u pritën pozitivisht pritshmëritë e shtetit arab për kërkesën botërore për hidrokarbure, të martën tregjet financiare u ulën sërish me më shumë se 1 për qind prej frikës se një valë e dytë pandemie mund ta keqësojë situatën.

Një fuçi nafte bruto e standardit Brent u vlerësua gjatë ditës me më pak se 43 dollarë apo 34 për qind më ulët nga viti në vit, ndërkohë që brutoja amerikane qëndroi në afro 40 dollarë fuçia.

Pasiguritë për tregun amerikan u shtuan edhe nga vendimi për pezullimin e një tubacioni nafte i cili sipas gjykatës po ndërtohej pa iu nënshtruar rregullave mjedisore.

Projekti gati 2 mijë kilometra i gjatë që do transportojë mes 4 shteteve amerikane një sasi prej 570 mijë fuçish nafte në ditë ishte mbështetur fuqimisht nga presidenti Donald Trump.

SHBA-ja, Arabia Saudite dhe Rusia si aleatë naftëprodhues të OPEK-ut prej muajit prill kanë vendosur të ulin prodhimin e tyre normal me gati 10 milionë fuçi në ditë edhe për korrikun.

Ekspertët parashikojnë që çmimi mesatar i naftës këtë vit të jetë 39 dollarë për fuçi, për të arritur vlerën e vitit të shkuar vetëm në 2023-in, kur do të kushtojë rreth 64 dollarë fuçia.

Komento:

	Komenti