Kosova edhe zyrtarisht ka hyrë në fushatën zgjedhore për zgjedhjet, të cilat do të mbahen me 9 shkurt 2025.

Partitë politike tashmë kanë filluar të njoftojnë për programet e tyre që lidhën me ekonominë, çështjet e brendshme, ato të jashtme, për tema që prekin interesin qytetar social, shëndetësor, kulturor e po ashtu edhe atij të sportit.

Partitë opozitare, tashmë kanë filluar t’i shfaqin programet e tyre, duke premtuar disa prej tyre rritje të pagave, rritje të koeficientit të pagës, mirëqenie për familjet (gratë dhe fëmijët), për kushte me të mira në punë dhe shëndetësi.

Po ashtu, partitë kanë shfaqur programet e tyre edhe mbi projektet kapitale që do i bëjnë me ardhjen e tyre në pushtet.

 

Arifi: Partitë do të duhej ta kishin një strategji për politikën e jashtme

Njohësi i politikës së jashtme, Dritëro Arifi,për FrontOnline ka komentuar premtimet e partive politike lidhur me diplomacinë e Kosovës, duke theksuar se ato nuk kanë shumë peshë në ndryshimin e përmbajtjes.

‘’Këto premtimet e pozitës dhe opozitës, nuk kanë shumë peshë se çka mund të ndryshojnë në përmbajtje’’ thotë ai.

Sipas Arifit, shteti i Kosovës ka nevojë për një strategji për politikën e jashtme, që duhet të përmirësohet nga çdo qeveri që vjen në pushtet..

‘’Shteti i Kosovës do të duhej të kishte një strategji për politikën e jashtme dhe diplomacinë. Çdo qeveri që do të vijë në pushtet duhet të përmirësojë politikën e jashtme, por nëse nisemi nga e para, mund të përballemi me regres, jo progres,” ka thënë Arifi.

Ai ka theksuar gjithashtu  se vendet e vogla si Kosova duhet të  koordinohen për politikë të jashtme me vendet e mëdha.

‘’Çështja e politikës së jashtme e vendeve të vogla duhet të jetë në koordinim me vendet e mëdha’’, përfundoi ai.

 

Njohësi i ekonomisë: Partitë u fokusuan tek rritja e pagave, por jo tek projektet kapitale – E pamundur rritja e premtuar

Njohësi i ekonomisë, Imer Raci, për FrontOnline ka folur lidhur me premtimet e partive politike për rritje të pagave, duke theksuar se një rritje masive e pagave është e pamundur për shkak të kufizimeve buxhetore.

Sipas Racit, nuk është realiste të dërgohet 50% e buxhetit të vendit në paga, pasi buxheti për paga deri tani ka qenë 32-33% e buxhetit të përgjithshëm.

“Shumë rritje të pagave janë të pamundura sepse nuk mundesh ti 50% të buxhetit të vendit me e dërgu në paga. Pjesëmarrja më e madhe ka qenë 32 ose 33%,” ka deklaruar Raci.

Ai ka shtuar se partitë politike duhet të përqendrohen më shumë në zhvillimin e projekteve kapitale, pasi ato janë mënyra më efektive për krijimin e vendeve të punës.

“Përmes zhvillimit të projekteve kapitale, krijohen më shumë vende pune dhe me krijimin e vendeve të punës mund të ndalosh edhe ikjen e të rinjve nga vendi, duke mundësuar që ata të kontribuojnë në zhvillimin e ekonomisë vendase,” theksoi Raci për FrontOnline.

Raci ka theksuar gjithashtu nevojën për përkrahje më të madhe për bizneset, duke përmendur si një mundësi mbështetjeje lehtësimin nga tatimi në vitin e parë të punës për ato biznese që fillojnë të operojnë.

‘’Edhe një premtim që ishte dashur të bëhëj për përkrahjen e bizneseve duke i liruar ato nga tatimi në vitin e parë të punës’’,  tha ai.

 

Komento:

	Komenti