Mohamed Salah ka njoftuar largimin e tij nga Liverpuli.
Sulmuesi egjiptian, përmes një video prekëse, ka bërë të ditur se do të jetë pjesë e ”Redsave”, deri në përfundim të këtij sezoni, edhe pse kontrata i skadon në vitin 2027, shkruan IndeksOnline.
”Përshëndetje të gjithë. Fatkeqësisht, dita erdhi. Kjo është pjesa e parë e lamtumirës time. Do të largohem nga Liverpool-i në fund të sezonit. Desha t’ia filloj duke thënë se kurrë s’e kam menduar se sa thellë do të bëhen pjesë e jetës time ky klub, ky qytet, këta njerëz. Liverpool-i nuk është thjesht një ekip. Është pasion. Është histori. Është një shpirt. Nuk mund t’ia shpjegoj me fjalë dikujt që nuk është pjesë e këtij klubi. I festuam fitoret. I fituam trofetë më të rëndësishëm dhe luftuam së bashku në kohët më të vështira në jetët tona. Dua të falënderoj të gjithë që ishin pjesë e këtij ekipi, përgjatë kohës time këtu, sidomos bashkëlojtarët, tani dhe në të kaluarën.
Për fansat… nuk kam mjaftueshëm fjalë. Përkrahja që më dhatë përgjatë kohës më të mirë të karrierës dhe qëndruat me mua në kohët më të vështira – është diçka që nuk do ta harroj kurrë dhe do ta kem me vete gjithmonë. Të shkosh nuk është kurrë lehtë. Ju me dhatë kohën më të mirë të jetës. Do të jem gjithmonë një prej jush. Ky klub gjithmonë do të jetë shtëpia ime – për mua dhe për familjen time.
Faleminderit për gjithçka! Falë jush, unë kurrë nuk do të ec vetëm.”, thuhet në mesazhin e Salah.
33-vjeçari u transferua te Liverpuli në vitin 2017 nga skuadra e Romës, ku që nga ajo kohë ka shënuar 255 gola në 435 paraqitje deri më sot e bëjnë egjiptianin të tretin në listën e golashënuesve më të mirë të të gjitha kohërave të Reds, duke fituar Këpucën e Artë të Premier League në katër raste.
Salah sa ishte pjesë e Liverpulit fitoi dy tituj të Premier Ligës, Ligën e Kampionëve, Kupën e Botës për Klube FIFA, Superkupën UEFA, Kupën FA dhe dy Kupa të Ligës, si dhe një Kupë Komuniteti FA.
3 °C
