Van Gaal nuk i kursen kritikat për yjet e Holandës pas barazimit me Ekuadorin.

Holanda nuk ka arritur më shumë se një barazim 1-1 ndaj Ekuadorit në ndeshjen e dytë të fazës së grupeve në Kampionatin Botëror ‘Katar 2022’.

Ka qenë një barazim i hidhur për ‘Tulipanët’, pasi fitorja eventuale do të thotë kalimi nga Grupi A.

Trajneri i Holandës, Louis Van Gaal ka thënë se kanë luajtur keq në zotërimin e topit, duke kritikuar futbollistët e tij.

“Edhe një herë luajtëm keq në fazën e zotërimit të topit. Skuadra përpiqet, por duhet të kesh cilësi për të treguar se sa vlen. Ne i humbëm të gjitha duelet dhe shpesh ia dhamë topin kundërshtarit. Është e pabesueshme se si luajtëm”, deklaroi Van Gaal.

Tutje trajneri holandez Van Gaal foli edhe për lojtarë të veçantë ku nuk munguan kritikat.

“Nathan Ake ishte njeriu ynë i lirë dhe duhej të kishte marrë më shumë iniciativë. I thashë gjithashtu në fund të pjesës së parë dhe ai doli më mirë në pjesën e dytë. Por nëse i gjithë ekipi nuk funksionon, bëhet e vështirë dhe është më mirë të marrësh një barazim sesa asgjë”, u shpreh Van Gaal.

Van Gaal beson se skuadra e tij do të kualifikohet pa problem nga Grupi A.

“Në Ligën e Kombeve kemi treguar se mund të luajmë mirë, por këta janë kundërshtarë të një stili tjetër, që mundohen të na pengojnë. Nuk jam aq i trishtuar, nuk kemi humbur ende, jemi në krye dhe do të qëndroj pranë lojtarëve të mi”, u shpreh trajneri holandez.

Komento:

	Komenti