Presidenti i Turqisë, Recep Tayyip Erdoğan, ka reaguar lidhur me zhvillimet e fundit në Lindjen e Mesme, duke shprehur shqetësimin e thellë për përshkallëzimin e tensioneve mes Shteteve të Bashkuara të Amerikës, Izraelit dhe Iranit.

Në një postim publik, Erdoğan theksoi se Ankaraja po punon për të garantuar një mjedis paqeje, qetësie dhe stabiliteti në rajon dhe në botën islame gjatë këtyre ditëve të bekuara.

Ai u shpreh i trishtuar dhe i shqetësuar për sulmet amerikano-izraelite ndaj Iranit, të cilat sipas tij nisën pas “provokimeve të Netanyahut”.

Presidenti turk bëri të ditur se ka zhvilluar biseda telefonike me ish-presidentin amerikan, Donald Trump, dhe me presidentin iranian, Masoud Pezeshkian.

Sipas tij, edhe vende të tjera të rajonit kanë ndërmarrë përpjekje për të ulur tensionet, por rezultati i dëshiruar nuk është arritur për shkak të mungesës së besimit mes palëve dhe përpjekjeve të vazhdueshme të Izraelit për të “helmuar procesin”.

Erdoğan dënoi shkeljen e sovranitetit të Iranit, si dhe sulmet e mëngjesit që, sipas tij, cenojnë paqen e popullit iranian.

Njëkohësisht, ai i cilësoi të papranueshme edhe sulmet me raketa dhe dronë të Iranit ndaj vendeve “motra” në Gjirin Persik.

“Pa hapjen e rrugës së diplomacisë, rajoni ynë rrezikon të zhytet në një rreth zjarri”, paralajmëroi ai, duke theksuar se kjo situatë nuk duhet lejuar të përshkallëzohet më tej.

Presidenti turk bëri thirrje për veprim urgjent nga të gjithë aktorët, veçanërisht nga bota islame, për të parandaluar zgjerimin e luftës dhe për të shmangur gjakderdhje të mëtejshme.

Ai shtoi se Turqia do të vazhdojë përpjekjet diplomatike për arritjen e një armëpushimi dhe rikthimin e palëve në tryezën e negociatave.

Sipas tij, ministri i Jashtëm dhe kreu i shërbimit inteligjent turk janë në kontakt intensiv me homologët e tyre.

Në fund, Erdoğan siguroi se nuk ka probleme sa i përket sigurisë së kufijve dhe hapësirës ajrore të Turqisë, duke theksuar se ushtria, xhandarmëria, policia dhe shërbimet e inteligjencës po marrin të gjitha masat e nevojshme në nivelin më të lartë.

“Si shtet dhe si komb, do të vazhdojmë të qëndrojmë pranë të gjithë popujve vëllezër në rajon deri sa të kapërcejmë këto ditë të vështira”, përfundoi ai.