Sot PD zgjedh Kryesinë e re, Basha lexon emrat e të ‘preferuarve’ – Ora Info Ballina | ORAinfo.com - Nuk ndalet

Sot PD zgjedh Kryesinë e re, Basha lexon emrat e të ‘preferuarve’

10:14 | 19 Janar 2019

Demokratët e Shqipërisë sot zgjedhin kupolën e re drejtuese të partisë, duke nisur nga kryesia, nënkryetarët dhe sekretariatet.

Një ditë para mbledhjes së Këshillit Kombëtar, Lulzim Basha bëri publike 15 propozimet e tij për anëtarë të Kryesisë së Partisë Demokratike.

Për ish-Presidentin Bujar Nishani, kryedemokrati Basha ka menduar një post honorifik në parti. “Propozoj për kryetar të Këshillit Kombëtar: Bujar Nishanin”, tha Basha. Kryetari demokrat kërkoi rikonfirmim për dy nënkryetarët e partisë, Edi Paloka dhe Edmond Spaho, ndërsa Arben Ristani, i cili kishte shpallur ambicien për një mandat të dytë si Sekretar i Përgjithshëm, propozohet për një tjetër post, si kryetar i Komisionit të Apelimit.

Në garën për numrin dy të partisë vihen re dy prurje të kryetarit demokrat, Gazment Bardhi, aktualisht këshilltar ligjor i selisë blu dhe këshilltari për ekonominë, Dorian Teliti.

Jemin Gjana dhe Halim Kosova ruajnë postet, ndërsa bie në sy rikthimi i ish-zëvëndësministrit të Financave, Alfred Rrushaj, i cili propozohet për drejtimin e bordit financiar.

Enno Bozdo ruan postin e anëtarit të thjeshtë të kryesisë, por ikën nga drejtimi i sekretarit organizativ të partisë, për drejtimin e të cilit propozohet të garojnë Sahit Dollapi dhe Lulzim Omuri.

Çlirim Gjata garon përballë Marinela Ziut për postin e sekretarit për çështje ligjore.

Ivi Kaso ka përballë ekspertin Dorjan Gjonmarkaj për postin e sekretarit për çështjet zgjedhore, ndërsa postin e sekretarit për burime njerëzore garojnë Ervin Minarolli dhe Minushe Lazaj, transmeton tch. Kryetarja e Lidhjes Demokratike të Gruas dhe kreu i Forumit Rinor të Partisë Demokratike janë anëtar ex officio të kryesisë.

Lulzim Basha ftoi demokratët të cilët duhet të bëhen pjesë e kryesisë së partisë të bëhen pjesë garës. Në rendin e ditës së mbledhjes së këshillit parashikohen dy pika: zgjedhja e ekipit të ri drejtues si dhe marrja e vendimit për datën e nisjes së protestave popullore.

Komento: