Nga sot studentët e UP-së do të marrin pjesë në aktivitetet e Qeverisë.

Nënshkruhet Memorandumi i Bashkëpunimit mes Kryeministrisë dhe UP-së – Parlamentit Studentor Prej sot studentët e Universitetit të Prishtinës do të marrin pjesë në aktivitete të Qeverisë të Kosovës, ndërsa kjo e fundit do t’iu ofrojë mbështetje për pjesëmarrje në konferenca ndërkombëtare.

Kështu u bë e ditur sot, me rastin e nënshkrimit të Memorandumit të Bashkëpunimit mes Zyrës së Kryeministrit dhe Universitetit të Prishtinës – Parlamentit Studentor, për nder të 12 Gushtit “Ditës Botërore të Rinisë”.

Koordinatori Nacional për Gjeneratën e Re, Avdullah Hasani, tha se marrëveshja e nënshkruar sot ishte e domosdoshme për të dyja palët, pasi përmes saj studentët bëhen pjesë e aktiviteteve të Qeverisë.

Ai tha se liria e lëvizjes po i pamundëson të rinjve të Kosovës që të udhëtojnë lirshëm.

“Qeveria e Kosovës zotohet se do të përkrahë të rinjtë në samite ndërkombëtare, do të përkrahë zhvillimin e aktiviteteve, kampanjave dhe fushatave sensibilizuese. Uroj që viti i ardhshëm të na gjejë duke lëvizur lirshëm në Evropë”, tha ai.

Kryetari i Parlamentit Studentor, Edon Nishori bëri të ditura pikat për të cilat kanë rënë dakord me Zyrën e Kryeministrit.

“Thelbësore është edhe krijimi i bibliotekave të zhurmshme në UP, ku studentët të mund të kryejnë të gjitha punimet seminarike, prezantimet duke mos dalë përtej këtij kampusi”, u shpreh ai.

Sot më 12 gusht shënohet Dita Ndërkombëtare e Rinisë, datë kjo kur edhe u aprovua me një rezolutë të posaçme nga Asambleja e Përgjithshme e OKB-së në vitin 1999. Shënimi i kësaj dite synon promovimin e aktiviteteve për të rinjtë, me qëllim që të pranojë dhe njoh përpjekjet dhe përkushtimin e të rinjve në mbarë botë për përmirësimin e shoqërisë.

Komento:

	Komenti