Autoritetet suedeze kanë raportuar një rrjedhje të katërt në një nga dy tubacionet Nord Stream që liderët e BE besojnë se u bë objekt sabotimi në fillim të javës, shkruan The Guardian.
Dy rrjedhjet në ujërat suedeze ishin afër njëra-tjetrës, tha një oficer i rojes bregdetare për gazetën Svenska Dagbladet.
Dagens Nyheter raportoi se një këputje, në Nord Stream 2, po shkaktonte një rreth flluskash në sipërfaqe prej rreth 900 metra në diametër dhe tjetra, që vinte nga një rrjedhje në Nord Stream 1, një rreth rreth 200 metra.
Gazi natyror po derdhet në Detin Baltik nga të dy tubacionet Nord Stream që nga e hëna. Ato janë ndërtuar për të transportuar gaz nga Rusia në Gjermani, por Nord Stream 2 nuk është aktivizuar kurrë dhe Nord Stream 1 ka qenë jashtë funksionit që nga fillimi i shtatorit. Të dy, megjithatë, ishin të ngarkuar me gaz kur ndodhën këputjet.
Sizmologët në Suedi dhe Danimarkë regjistruan shpërthime nënujore pranë ishullit Bornholm të hënën në mëngjes dhe të hënën në mbrëmje, duke sugjeruar një akt të qëllimshëm sabotimi. Një sizmolog i cituar nga Svenska Dagbladet nuk përjashtoi mundësinë e një shpërthimi të tretë.
Ekspertët teknikë thonë se tubacionet do të bëhen më të vështira për t’u riparuar pasi i gjithë gazi të ketë ikur dhe ato të mbushen me ujë deti dhe të fillojnë të gërryhen.
4 °C
