Ministri i Punëve të Jashtme, Xhelal Sveçla, ka folur për zgjedhjet e 23 prillit në katër komunat veriore të Kosovës.

Sveçla ka thënë që Beogradi përveç që ka bërë ftesë për mosdalje në zgjedhje, edhe ka kërcënuar.

“Nuk ishte vetëm që i bënë ftesë, ata edhe kërcënuan. Ata thanë se çdokush që do të dalë dhe do të votojë do të identifikohet, është armik i Serbisë”, tha Sveçla në një intervistë për RTK.

Tutje, Sveçla tha se strukturat paralele të Serbisë monitoruan këto zgjedhje duke qëndruar 100 metra larg vendvotimeve, kështu për t’u siguruar që shiheshin prej popullit, e për të përçuar mesazhin se do të identifikoheshin nëse do të votonin.

“Ata në fakt edhe monitoronin vendvotimet tona qoftë përmes kamerave elektronike qoftë edhe përmes individëve që shëtisnin rreth e çark”.

Ministri Sveçla tha se këto struktura paralele janë identifikuar.

Sipas tij, rolin e raportuesit për Serbinë edhe në zgjedhje e luajtën ish-zyrtarët policorë serbë që dhanë dorëheqje nga institucionet e Kosovës.

“Ish-zyrtarët policorë të cilët kanë dhënë dorëheqje, të cilët luajnë një kinse rol të kujdestarisë të themi më mirë, se jo policor, sepse nuk kanë kapacitetet dhe as mundësitë por një lloj inteligjence të heshtur, të cilët pastaj të gjitha këto informata ia raportojnë Serbisë”, shtoi Sveçla.

Kjo, sipas Sveçlës, ka shkaktuar frikë te serbët e Kosovës.

Tutje, ai tha se janë duke punuar jo vetëm në identifikimin por dhe dëshmimin e veprimeve të tyre ilegale.

Të gjitha këto, tha ministri Sveçla, do të adresohen në Prokurori.

Komento:

	Komenti