Presidenti i SHBA-së, Donald Trump, ka deklaruar se Shtetet e Bashkuara do t’i përgjigjen sulmit ndaj ambasadës amerikane në Riad.

Lajmi u bë i ditur nga gazetarja e NewsNation TV, Kelly Meyer, e cila përmes një postimi në rrjetin social “X” tha se kishte komunikuar me kreun e Shtëpisë së Bardhë.

“Sapo fola me Presidentin Trump. Ai tha se së shpejti do të mësoni se cili do të jetë reagimi ndaj sulmit ndaj ambasadës amerikane në Riad dhe vrasjes së ushtarakëve amerikanë”, shkroi Meyer.

Sipas saj, Trump theksoi gjithashtu se nuk e konsideron të nevojshme dërgimin e trupave në Iran.

Ndërkohë, Ministria e Mbrojtjes e Arabisë Saudite njoftoi se ambasada amerikane në Riad u sulmua nga dy mjete ajrore pa pilot (UAV), ndërsa një zjarr shpërtheu në ambientet e misionit diplomatik.

Gazetarja e Fox News, Jennifer Griffin, raportoi se nuk pati të lënduar, pasi ndërtesa ishte evakuuar paraprakisht.